Vann LIV-mótaröðina annað árið í röð

John Rahm hefur unnið LIV-mótaröðina annað skiptið í röð. Hann er 219 stigum á undan Bryson DeChambeau í öðru sætinu fyrir síðustu einstaklingskeppni tímabilsins. Hann hefur því tryggt sigurinn.

Rahm endaði í 41. sæti um helgina á LIV-móti sem var haldið í New York en það var nóg til að tryggja titilinn. Joaquin Nieman sigraði mótið sjálft en hann endaði á sextán höggum undir pari, 24 höggum á undan sigurvegara mótaraðarinnar.

Spænski kylfingurinn vann aðeins tvö mót á LIV-mótaröðinni á tímabilinu en hann endaði fjórum sinnum í öðru sæti. Hann náði að vinna tímabilið í fyrra án þess að vinna nokkurt mót og því fínasta tilbreyting.

„Þetta er búið að vera frábært ár. Smá súrsætt vegna lélegrar spilamennsku þessa vikuna en tímabilið er eitthvað sem ég get verið stoltur af,“ sagði Rahm eftir að hafa unnið tímabilið.

Hann bætti einnig við að það hefði verið gott að vinna aftur eftir að hafa efast um sjálfan sig eftir tímabilið í fyrra. Hann var ekki viss um hvort að hann ætti skilið að vera sigurvegari eftir að hafa ekki unnið eitt einasta mót.

Síðasta mót LIV-mótaraðarinnar er í lok ágúst þar sem keppt verður í Michigan í Bandaríkjunum.