Gagn­rýnd fyrir að hrekkja kylfusveininn

Enski kylfingurinn Charley Hull lék gott golf á fyrsta hring Opna breska risamótsins í golfi sem stendur yfir nú um helgina. Eftir fyrsta hringinn var hún á tveimur höggum undir pari sem skilaði henni í áttunda sæti.

Í viðtali fyrir keppnina sagði hún frá hrekk sem hún gerði við kylfusveininn sinn, Adam Woodward. Þar segir hún frá því að hún hafi keypt platlottómiða og gaf kylfusveininum sínum þá. Woodward hélt að hann hefði unnið 100 þúsund dollara og hoppað í kringum svæðið kampakátur.

Eftir ofsagleði Woodwards þurfti Hull að viðurkenna fyrir honum að miðinn væri ekki í alvöru og hann hefði í rauninni ekki unnið neitt. Kylfusveinninn var ekki glaður eftir að hafa frétt það og hótaði að hætta sem kylfusveinn Hull.

Eftir að Hull sagði frá hrekknum hefur hún sætt gagnrýni þar sem fólki fannst hrekkurinn vera grimmur. Hull lét það þó lítið á sig fá og bað fólk einfaldlega um að horfa á björtu hliðarnar á þessu.

„Ég myndi 100 prósent gera eitthvað svipað aftur. Honum [Woodward] sjálfum fannst þetta fyndið eftir á. Mér leið smá illa fyrir hans hönd en ég ætla að gefa honum alvöru lottómiða eftir mótið.“