Jón Þór Hauks­son: „Með ó­líkindum að við klárum ekki þennan leik“

Jón Þór Hauksson, þjálfari Stjörnunnar, segist ekki hafa vantað upp á neitt hjá sínum mönnum í seinni hálfleik annað en að boltinn færi í markið.

„Að boltinn fari bara inn í seinni hálfleik. Mér fannst þetta vera hörku leikur í fyrri hálfleik og svolítið fram og til baka og kaos á köflum. Síðan í seinni hálfleik finnst mér við taka algjörlega yfir leikinn og í raun bara eitt lið á vellinum í seinni hálfleik. Ótrúlegt að hafa ekki náð að klára það, er drullu svekktur með það.“

FH hóf leikin mun betur og voru fyrri til að skora. Gestirnir tóku sér þó ekki langan tíma í það að jafna leikinn. Jón Þór bjóst við að FH kæmi inn í leikinn af fullum krafti.

„Eins og við mátti búast þá fengum við FH-ingana mjög kröftuga og orkumikla inn í leikinn og við vissum það. Þetta er lið sem er að reyna að rembast við það að stoppa blæðinguna sem er búin að vera hérna í sumar og eru núna fjórða leikinn í röð að fara án taps.

Við vissum hvernig þeir kæmu inn í leikinn og mér fannst við ekki takast nægilega vel við það. Menn áttu erfitt með að fóta sig og fyrsta snerting á boltann og sendingar lélegar og þar fram eftir götunum. Svo komum við sterkir út í seinni hálfleikinn og tókum öll völd á vellinum fannst mér, bara með ólíkindum að við klárum ekki þennan leik hérna.“

Á 69. mínútu skipti Jón Þór tveimur af allra bestu mönnum Stjörnunnar, Birni Snæ og Örvari Eggertssyni, af velli. Birnir Snær hafði lagt upp fyrra mark Stjörnunnar og átt lykilsendingu í síðara markinu sem Örvar skoraði. Aðspurður hver ástæðan væri fyrir að hann hafi tekið þá af velli, sagði Jón Þór enga sérstaka ástæðu liggja að baki aðra en þá að fá inn nýja leikmenn sem áttu að landa sigri.

„Nei, bara í þessari leit okkar að vinna þennan leik gerðum við þessa skiptingu. Við vildum bara annað krydd í það og það lá ekkert annað að baki þess.“

Jón Þór var spurður að lokum hvort Stjarnan tæki eitthvað með sér frá þessum leik. Var svarið stutt.

„Ekki neitt.“