Fyrir­liði FH sleit krossband

Tímabilinu er þar með lokið hjá hinni 25 ára gömlu Kötlu Maríu sem verið hefur burðarás í liði FH eftir að hún sneri heim frá Svíþjóð fyrir síðustu leiktíð. Hún átti sinn þátt í því að FH hafnaði í 2. sæti Bestu deildarinnar á síðustu leiktíð.

Katla María fór meidd af velli eftir 27 mínútna leik gegn Stjörnunni á Samsungvellinum í Garðabæ fyrir tíu dögum. FH-ingar staðfestu svo á samfélagsmiðlum sínum í gærkvöld að hún hefði slitið krossband, rétt eins og annar FH-ingur, Jóhann Ægir Arnarsson, sem var að láni hjá Njarðvík.

Þrátt fyrir meiðsli Kötlu Maríu náði FH að vinna Stjörnuna í síðasta deildarleik og svo Selfoss í 16-liða úrslitum Mjólkurbikarsins.

Liðið mætir næst ÍBV í kvöld, klukkan 18 í Kaplakrika, og freistar þess að sækja að efstu liðunum en ÍBV og Breiðablik eru með fullt hús stiga eftir fjórar umferðir, eða 12 stig, og FH með sjö stig.