Mikil mis­tök að hafa selt Viggó

Leipzig situr á botni þýsku deildarinnar, með 13 stig eftir 30 leiki, stigi á eftir Minden og tveimur á eftir Wetzlar sem auk þess er með mun betri markatölu. Tvö neðstu liðin falla niður um deild og ljóst að það yrði mikið áfall fyrir Leipzig.

Þess vegna sjá Günther og félagar nú mjög eftir því að hafa ákveðið að selja Viggó um áramótin 2024-25:

„Þegar við lítum til baka hefðum við örugglega gert ýmislegt öðruvísi. Þegar við tókum ákvörðunina vorum við öll sannfærð um að það væri rétta skrefið. Og það er heldur ekki einn einstakur atburður sem er úrslitaatriðið. Það er samspil atburða og þar eru skipti Viggós yfir til Erlangen vissulega einn þeirra,“ sagði Günther við Dyn streymisveituna, samkvæmt Handball World.

Viggó hafði verið lykilmaður hjá Leipzig en rétt fyrir jólin 2024 ákváðu forráðamenn félagsins að taka tilboði Erlangen og selja örvhentu marka- og stoðsendingamaskínuna sína.

Erlangen var í fallsæti þegar Viggó kom en hann átti svo sinn þátt í halda liðinu uppi og er Erlangen í 14. sæti af 18 liðum þegar fjórar umferðir eru eftir af yfirstandandi leiktíð.

Viggó, sem reyndar á við meiðsli að stríða, er svo á leið til stórliðs Flensburg í sumar.

Günther segir að þó svo illa færi að Leipzig félli um deild þá sé búið að semja um að leikmenn á borð við þýska landsliðsmanninn og Franz Semper og Slóvenann Dean Bombac verði áfram í liðinu. Fall myndi engu að síður hafa afar mikil áhrif.

„Að sjálfsögðu er það gríðarleg skerðing fyrir allt félagið að þurfa að laga fjárhagsáætlunina að falli úr 1. deild í 2. deild. Ég myndi gjarnan vilja hlífa okkur öllum við því.“