Hittu sjálfan Jacquemus í New York

Dóra Júlía Agnarsdóttir skrifar 4. maí 2026 14:54

Rándýrar sjálfsmyndir í bígerð hjá Birtu Líf og Sunnevu með hönnuðinum Jacquemus. Instagram

Teboðsskvísurnar og hlaðvarpsstýrurnar Sunneva Einarsdóttir og Birta Líf Ólafsdóttir eru staddar í New York með Hildi Sif Hauksdóttur og Páli Orra Pálssyni í sannkallaðri pæjuferð. Skvísurnar tóku upp hlaðvarpsþátt í stórborginni, djömmuðu á flöskuborði á skemmtistaðnum Marquee í New York og hittu uppáhalds tískuhönnuðinn þeirra, Simon Porte Jacquemus.

Sunneva og Birta Líf eru bestu vinkonur og hafa stýrt hlaðvarpinu Teboðið í áraraðir.

Sunneva hefur sömuleiðis verið í raunveruleikaþáttunum LXS ásamt Hildi Sif, Birgittu Líf og fleiri skvísum.

Sunneva og Birta eru duglegar að ferðast og skvísast um allan heim. Þær tóku nýverið upp þátt í Mílanó og voru stuttu síðar mættar í stóra eplið.

Sunneva og Birta alltaf smart skelltu sér í dinner, fóru á flöskuborð á Marquee næturklúbbnum, tóku upp Teboðshlapvarp og hittu uppáhalds tískuhönnuðinn í New York.Instagram

Stelpurnar hafa löngum elskað franska tískumerkið Jacquemus sem Simon Porte Jacquemus stofnaði árið 2009, þá einungis nítján ára gamall.

Merkið hefur vaxið gríðarlega mikið á undanförnum árum og er hvað þekktast fyrir einstakar handtöskur sem eru gjarnan í skemmtilegum litum. Sunneva Einars hefur verið sérstaklega áberandi með bleika slíka tösku uppi á arminum á hinum ýmsu viðburðum. Því var mikill draumur þegar stelpurnar rákust á kappann í Soho hverfinu í New York fyrir utan Jacquemus verslunina þar.

„GAHHHHH vorum að hitta the one and only Jacquemus. Er ekki búin að jafna mig,“ skrifar Sunneva í Instagram hringrásina hjá sér og bætir við að hann sé alvöru goðsögn.