Einar Bragi öflugur í mikil­vægum Evrópusigri

Um sannkallaðan spennutrylli var að ræða þar sem að Axel Mansson fór mikinn á lokamínútunum, skoraði síðustu fjögur mörk liðsins og tryggði Kristianstad sigur með lokamarki leiksins þegar innan við ein mínúta eftir lifði leiks. 

Einar Bragi var drjúgur fyrir Kristianstad í kvöld og skoraði fjögur mörk. Reynir Þór skoraði þrjú mörk fyrir Melsungen og lagði upp eitt. Þá skoraði Arnar Freyr eitt mark. 

Um fyrsta sigur Kristianstad var að ræða í keppninni þetta tímabilið og eru möguleikar liðsins, er snúa að því að tryggja sér sæti í næsta hluta keppninnar, enn á lífi fyrir lokaumferð riðlakeppninnar. 

Melsungen er sem stendur á toppi síns riðils og með örlögin í sínum höndum fyrir lokaumferð riðlakeppninnar. 

Þá lagði Tryggvi Þórisson upp eitt mark þegar að lið hans Elverum hafði betur gegn liði SAH í toppslag annars riðils. Lokatölur urðu 31-24 Elverum í vil. SAH og Elverum eru jöfn á toppi riðilsins með sex stig fyrir lokaumferðina. Með sigri seinna í kvöld getur Porto, með Þorstein Leó Gunnarsson í fararbroddi, komið sér í þann pakka líka.