Stofnaði kökufyrirtæki 21 árs í Köben og fyrstu árin voru erfið

Ynja hefur núna rekið kökufyrirtækið í sjö ár og mamma hennar, sem starfar sem barnasálfræðingur á Íslandi, er orðin fjármálastjóri fyrirtækisins í hjáverkum. „Það er auðvelt að stofna fyrirtæki en það er bara mjög erfitt að láta það ganga upp,“ segir Ynja í spjalli við Lóu Pind Aldísardóttur en þau Ívar Kristján Ívarsson myndatökumaður heimsóttu Ynju og fjölskyldu til Köben fyrir 5. þátt af þáttaröðinni Hvar er best að búa? Ynja féll fyrir aðalkökuskreyti fyrirtækisins, honum Aziz frá Azerbaísjan, og þau eiga nú 2 kornunga syni - sem Ynja telur líklegt að séu einu íslensk-azersku börnin í heiminum.

Í þáttaröðinni heimsækir Lóa alls konar fólk, m.a. íslenskar konur sem féllu fyrir ítölsku eyjalífi, unga frumkvöðla sem ákváðu að setjast að nálægt alþjóðaflugvöllum til að auðvelda ferðalög milli heimsálfa, kjarnafjölskyldu úr Hafnarfirði sem hafnaði íslenska lánakerfinu og eiga nú skuldlaust hús í spænskri sveit, konu á miðjum aldri sem fann ástina í örmum Spánverja á Djúpavogi sem leiddi þau til Andalúsíu þar sem við fylgjumst með brúðkaupi þeirra. Og loks kynnumst við hjónum á besta aldri sem höfðu kjark til að setjast að í alræmdri stórborg í Nígeríu umkringd vopnuðum öryggisvörðum.

Í myndbandinu sem hér fylgir má sjá brot úr þættinum sem fór inn á streymiveituna Sýn+ í gær og verður seinna sýndur í línulegri dagskrá á Sýn.

Framleiðandi og leikstjóri þáttanna er Lóa Pind Aldísardóttir, aðalmyndatökumaður seríunnar er Ívar Kristján Ívarsson og klippingu annaðist Magnús Ingvar Bjarnason. Framleitt af Lóu Production fyrir Sýn.