Alexandra Helga lokar Míu

„Eftir þó nokkra yfirlegu og umhugsun hef ég ákveðið að það sé komið að leiðarlokum í einu skemmtilegasta ferðalagi sem ég hef farið í. Verslunin mín Mía mun því loka á næstu vikum,“ skrifar Alexandra í færslu sem hún birti á Instagram fyrir skömmu.

Segir hún að Mía hafi verið „þriðja barnið“ sitt frá því hún opnaði sem netverslun sumarið 2022. Alexandra stofnaði þá netverslunina Móu&Míu með Móeiði Lár­us­dótt­ir en þær slitu samstarfinu í nóvmber 2023. Í kjölfarið breytti Alexandra nafninu í Míu og opnaði verslunina í húsnæði í Ármúla 40 sem hún hafði keypt fyrr á árinu.

„Þó að verslunarrekstur sé gefandi og skemmtilegur þá er hann á sama tíma krefjandi og nú hef ég ákveðið að snúa mér að öðrum verkefnum ásamt því að gefa hinum tveimur börnunum mínum meiri tíma og athygli,“ skrifar Alexandra í færslunni.

Hún hafi á þessu tímabili kynnst „yndislegum hópi viðskiptavina, frábæru starfsfólki, faglegum og flottum birgjum og fleiri aðilum sem með einum eða öðrum hætti lögðu lóð sín á vogarskálarnar í rekstri Míu“ og þakkar þeim öllum fyrir samfylgdina.

„Eins og tíðkast þegar verslanir loka þá ætlum við að bjóða vörurnar okkar til sölu á útsöluverðum þar til lagerinn klárast. Við viljum því bjóða ykkur velkomin á rýmingarsölu Míu sem mun standa yfir meðan birgðir endast,“ skrifar hún að lokum.