„Þetta er ekki flókið“

„Þetta er fínasti bær og hótelið fínt. Það er allt eins og það á að vera,“ segir Ómar Ingi um aðstæður hér í Kristianstad í Svíþjóð.

Landsliðið lenti í gær eftir fínasta undirbúning í Frakklandi þar sem liðið vann Slóvena örugglega og tapaði naumlega fyrir Evrópumeisturum Frakka.

„Þetta gekk þokkalega. Við spiluðum ágætlega, það var eitthvað gott og eitthvað slæmt. Við vonandi náum að slípa okkur aðeins til, að laga það sem var ekki nógu gott en að sama skapi halda áfram því sem við gerðum vel,“ segir Ómar. Hvað þarf þá að laga?

„Við þurfum að vera aðeins klókari sóknarlega og finna betur lausnir á ákveðnum stöðum. En við sjáum hvort við náum ekki að slípa það aðeins saman,“ segir Ómar.

Fjölmargir erlendir sérfræðingar hafa spáð Íslandi góðum árangri á mótinu og gera ráð fyrir að liðið komist í undanúrslit og spili því um verðlaunasæti.

Hefur sú umræða einhver áhrif?

„Við finnum ekkert þannig fyrir því. Við viljum gera vel og setjum á okkur sjálfir pressu. Það er aðallega það sem við erum að pæla, við viljum hámarka okkar frammistöðu. Það er það sem við einblínum á,“ segir Ómar.

Hver eru hans persónulegu markmið fyrir mótið?

„Ég vil spila vel og hjálpa liðinu. Það er aðallega það og ná í góð úrslit. Þetta er ekki flókið,“ segir Ómar sem kemur ferskur til leiks eftir að hafa misst af HM í fyrra vegna meiðsla.

„Ég er ánægður að koma aftur inn og nýt þess að vera hérna. Það er líka markmið hjá mér að njóta þess að spila og hafa gaman að þessu.“

Viðtalið við Ómar má sjá í spilaranum.

Ísland mætir Ítalíu klukkan 17:00 á morgun. Teymi Sýnar mun fylgja landsliðinu eftir hvert fótmál fram að leik.

Honum verður lýst í beinni textalýsingu hér á Vísi.