Ekki of seint að breyta starfs­frama eða vinnu eftir fimm­tugt

Samt er það þannig að það er aldrei of seint fyrir okkur að vinna að því að láta drauma okkar rætast. Eða að setja okkur það markmið að vera ánægð í lífi og starfi.

Hið eðlilega er síðan að áherslurnar breytist. Það sem okkur fannst kannski mest spennandi í starfsframanum þegar við erum þrítug er ekkert endilega það sama tuttugu árum síðar.

Fólk sem er því orðið fimmtugt eða eldra ætti því ekki að neita sjálfu sér um það að velta hlutunum fyrir sér. Því stundum leiðir slík sjálfskoðun einfaldlega til þess að við verðum ánægðari með það sem við höfum nú þegar; Áttum okkur jafnvel á að það er eitthvað allt annað í lífinu en vinnan okkar sem mætti fá meiri fókus eða við að breyta.

Að fólki langi til að breyta um starf eða starfsvettvang eftir vinnu getur líka skýrst af ýmsu. Til dæmis eftirfarandi:

Leiði – ekki lengur þessi ánægja og drifkraftur í vinnunni eins og var

Fjárhagsleg staða er öðruvísi en áður – getur bæði verið sú að þú þarft á því að halda að þéna meiri tekjur eða sért á þeim stað að það sé í lagi að lækka í tekjum en hafa það samt gott

Jafnvægi einkalífs og vinnu getur farið að kalla meira. Sérstaklega ef að vinnan hefur verið í 1.sæti í áratugi

Óöryggi í starfsumhverfi – til dæmis mikið um uppsagnir eða samdrátt í geiranum og fyrirséð að starfsumhverfið verður ekki öruggt til lengdar

Kulnun

En eins og í öðru, þurfa markmiðin okkar og draumar fyrst og fremst að vera alveg skýr, áður en lagt er af stað. Mikilvægast er því að byrja á því að horfa inn á við.

Og passa þá þar að festast ekki í viðjum vanans: Ekki að hugsa..... 

Ég verð að vera í starfi sem býður að minnsta kosti upp á þessi laun, mannaforráð og stjórnendatitil. 

Frekar að hugsa: Autt blað, ánægja, gleði, hamingja.

Hér eru nokkrar spurningar sem eru sagðar geta hjálpað fólki sem er um eða eftir fimmtugt og að velta fyrir sér, hvort það ætti að breyta um starfsvettvang eða vinnu eða ekki.

Hvað langar mig raunverulega?

Í hverju er ég mjög góð/góður í?

Hverjar eru lykiláherslurnar mínar varðandi starfið mitt og starfsframann framundan? Þetta gætu til dæmis verið atriði eins og hærri laun eða staða, meiri lífeyrissparnaður, meiri sveigjanleiki í starfi, að minnka vinnuna og fara í hlutastarf.

Hvað í leik og starfi gefur mér drifkraft og gleði og hvað er það helst sem dregur mig niður?

Er ég í rétta starfinu miðað við svörin við ofangreindum spurningum eða ætti ég að huga að breytingum? Ef já, eru þær breytingar aðkallandi, róttækar eða eitthvað sem ég get einfaldlega unnið að því að lagfæra eða breyta sjálf/ur í núverandi starfi?

Fólk í atvinnuleit gæti umorðað síðustu spurninguna og velt fyrir sér, hvort það sé að leita af réttu starfi eða starfsumhverfi, miðað við svörin við spurningunum.