Svona verða stórtón­leikar Kaleo í Vagla­skógi

Stórtónleikar hljómsveitarinnar Kaleo, Vor í Vaglaskógi, fara fram laugardaginn næstkomandi í Vaglaskógi. Uppselt varð á tónleikana á örskotstundu en um er að ræða fyrstu tónleika sveitarinnar á Íslandi síðan 2015.

Jakob Frímann var til viðtals í Bítinu á Bylgjunni í morgun þar tónleikarnir voru til umræðu og skipulagning þeirra. Hann segir að best væri að sem flestir færu á tónleikasvæðið með rútuferðum frá Glerártorgi sem tónleikahaldarar bjóða upp á. Hægt sé að panta sæti á sba.is

„Það er hægt að fara með sætaferðum klukkan ellefu, tólf, eitt, tvö, þrjú, fjögur, og fimm, og það er ódýrara að stökkva upp í rútu sem sækir þig síðan að tónleikum afloknum, heldur en að aka í gegnum göngin fram og til baka.“

„Skipulagið er þannig að frumkvæði lögreglu, að það er byrjað að hleypa inn á föstudagseftirmiðdag, eftir klukkan fjögur geta menn komið sem ætla vera og gista, aðfararnótt laugardags og aðfararnótt sunnudags.“

„Ef þú ætlar að tjalda, þá færðu bara stæði fyrir bílinn, þá ertu ekkert að hreyfa hann fyrr en að afloknum tónleikum.“

„Það er bara fínt, þetta er allt innifalið, það eru engin bílastæðagjöld eða tjaldstæðagjöld, þetta er bara innifalið í einhverjum ódýrasta miða sem að boðinn hefur verið á tónleika, hvað þá tónlistarhátíð í átta tíma hjá heimsfrægri hljómsveit,“ segir Jakob.

Fyrir þá sem ekki ætla að tjalda sé langbest að taka rútuna, sem hafi forgangsaðgengi að svæðinu.

„Síðan ef þú kemur eftir klukkan 14 á laugardaginn, þá lokar lögreglan fyrir umferð en þá verður þú að leggja bílnum í tveggja kílómetra fjarlægð, og þá eru skutlur sem skutla þér.“

Miðarnir kláruðust áður en byrjað var að auglýsa

Jakob segir að hann hafi staðið fyrir mörgum stórum viðburðum á sínum ferli, en hann hafi aldrei fengið jafn samhljóma jákvæð viðbrögð og nú.

„Lögregla, slökkvilið, sjúkralið, hjálparsveita, heimamanna í Fnjóskadal, þetta er bara eins og einn samstilltur mótor sem vill láta viðburðinn heppnast upp á tíu.“

Hann segir að um sjö þúsund manns séu með miða, og það sé hæglega pláss fyrir allt fólkið.

„Já þetta er nefnilega gríðarlega vel af guði gert þetta svæði. Það eru sjö þúsund manns sem komast þarna inn, en það hefðu getað verið tuttugu þúsund held ég, en miðarnir kláruðust áður en byrjað var að auglýsa.“

Níu hektara tún

Jakob segir svo frá tilurð lagsins Vor í Vaglaskógi, sem varð heimsfrægt í flutningi Kaelo.

„Þetta er falleg rómantísk flétta þegar Kristján frá Djúpalæk fer í Vaglaskóg, hrífst af þessum yndislega stað. Hann fer í picnic, fer heim og semur ljóðið Vor í Vaglaskógi.“

„Jónas Jónasson útvarpsmaður og fyrsti útvarpsstjóri Rúv á Akureyri semur lagið. Ingimar Eydal tekur lagið, útsetur, fær Villa Vill að syngja það.“

„Svo þrjátíu árum síðar kemur næsta kynslóð, tekur lagið til endurflutnings og til endurútgáfu. Það markar upphaf einhverrar mestu sigurgöngu íslenskra tónlistarmanna í háa herrans tíð, ef ekki frá upphafi,“ segir Jakob.

Kaleo, sem hann segir kraftmestu og víðförlustu hljómsveit Íslands undanfarin ár, taki svo lagið á öllum tónleikum.

„Þetta er mest spilaða lag á íslensku sem hefur verið samið,“ segir Jakob.

Jakob segir að hátíðarsvæðið verði á níu hektara túni. Bílarnir verði syðst í túninu, síðan komi tjaldstæði vel afgirt frá bílastæðunum, og svo tónleikasvæðið sjálft.

„Það verður matar- og veitingaþorp þar, og salernisaðastaða og allt sem þarf til að láta svona viðburð verða upp á tíu.“

Dagskrá hefst á laugardaginn klukkan 14, þegar plötusnúðurinn Doctor Victor þeytir skífum í klukkustund. Svo stíga sjálfir Kaleo-menn á stokk klukkan 15 og flytja órafmagnaða „unplugged“ dagskrá í varðeldastíl.

Í kjölfarið hefst svo tónlistarveisla þar sem fjölmargir listamenn stíga á stokk. Sigrún Stella, Svavar Knútur, Soffía Björg, Bear the Ant, Jack Magnet, Júníus Meyvant, og Hjálmar koma fram áður en komið er að hápunkti kvöldsins þegar Kaleo stígur aftur á stokk klukkan níu.

Hægt er að lesa meira um dagskrána á vefsíðu tónlistarhátíðarinnar.