Af hverju vinkar Teslan alltaf á sama stað?

Gunnlaugur Sigurjónsson, Teslu-eigandi, birti á mánudaginn færslu í Facebook-hópnum Tesla-eigendur og áhugafólk þar sem hann vildi athuga hvort fleiri glímdu við sama vandamál og hann:

„Tesla Model 3-bíllinn hjá mér setur alltaf einn hliðarspegilinn inn og svo aftur til baka á nákvæmlega sama punktinum á einni götu á Selfossi hvergi annars staðar so far.. fyrri eigandinn talaði um þetta líka og ég varð bara að athuga þetta, er einhver sem kannast við þetta? Finnst þetta frekar furðulegt.“

Viðbrögðin stóðu ekki á sér í hópnum, fjöldi Teslu-eigenda hafði greinilega lent í sambærilegum atvikum. 

Bílastæði Costco, Reynir bakari og sami blettur á Selfossi

Einn eigandinn sagðist lenda í þessu sama „á ákveðnum stað á bílastæði Costco,“ annar lendir alltaf í þessu í Dugguvoginum, sá þriðji „alltaf hjá Reyni bakara á Dalveginum“ og sá fjórði „á ljósunum á gatnamótunum Suðurlandsbraut-Grensás við Laugardalinn.“

Skrítnast var þó að Guðný Þorsteinsdóttir hafði ekki bara lent í því að hliðarspeglarnir hennar vinkuðu, heldur vinkuðu þeir á sama stað og bíll Gunnlaugs á Selfossi.

„En fyndið, ég átti 2020 Teslu og þetta gerðist aðeins á þessum eina stað á Selfossi. Fór síðustu helgi á sama stað á nýrri Teslu og þá gerðist ekkert,“ skrifaði Guðný við færsluna. 

Málið reyndist eiga rökrétta skýringu.

„hahaha ég er sá sem var að kaupa þína gömlu,“ svaraði Gunnlaugur.

Rakaskemmd eða stillingaratriði

Þá voru nokkrir sem höfðu skýringar á málinu, þó ólíkar væru.

„Þetta tengist raka í tengjum inni í hurðinni. Búið að skipta um báða speglana hjá mér,“ skrifaði Böðvar Eggertsson í ummælum.

Gunnlaugur gaf lítið fyrir þá skýringu í ljósi þess að speglarnir vinka bara á einum og sama punktinum. 

Svala Rut var með aðra lógískari skýringu:

„Lenti í þessu í Skeifunni um daginn, þá var kallinn búinn að stilla speglana þannig að þeir fara inn á við hjá kfc í Skeifunni, svo hann gæti pantað sér mat og farið nálægt lúgunni án þess að reka spegilinn í.“

Einar Hreiðarsson tók undir þá greiningu:

„Ég fann út úr þessu hjá mér, þið hafið verið að fikta í speglunum og vistað staðsetninguna óvart, þá gerir hann þetta alltaf á sama stað. Það þarf að fara á sama stað og aftengja vistunina.“

Dularfulla vinkið enn óleyst

Þáttastjórnendur Bítisins slógu á þráðinn til Gunnlaugs til að komast að því hvort hann hefði komist til botns í vinkinu.

Þetta er hið dularfyllsta mál, er hún farin að vinka Teslan þín á akkúrat einum sama stað á Selfossi?

„Já, bara á nákvæmlega sama punktinum alltaf,“ segir Gunnlaugur.

Býrðu á Selfossi?

„Nei, ég bý í Reykjavík. Og nei, ég var ekki að fara spes ferð á Selfoss til að athuga þetta. Svo mundi ég eftir því að konan sem ég keypti bílinn af talaði um þetta,“ segir hann.

Bíddu, þegar hún seldi þér bílinn sagði hún að hann ætti til að vinka?

„Við vorum að ganga frá eigendaskiptunum og þá sagði hún: ,Ég gleymdi að segja þér, hann vinkar hérna á einni götu á Selfossi.' Og ég bara: ,Ha! Ókei',“ segir Gunnlaugur.

Hvað veldur? Ertu búinn að komast að því?

„Samkvæmt kommentakerfinu getur þetta verið stillingaratriði sem einhver fyrri eigandi hefur stillt í,“ segir Gunnlaugur. 

Hins vegar er hann ekki enn búinn að komast að því hvort það eigi við um hans eigin bíl. Væntanlega þarf hann að gera sér aðra ferð á Selfoss til að komast að því.