Væri teiknimyndapersóna í full­komnum heimi

Vaka ræddi við blaðamann um klæðaburð og tískuna. 

Hvað finnst þér skemmtilegast við tískuna?

Það er skemmtilegt hversu persónuleg og margvísleg tískan getur verið. Hvernig fólk ber sig í fötum sem þeim finnst flott og fara þeim vel. Hvernig fólk tjáir sig með fötunum sínum.

Hver er uppáhalds flíkin þín og af hverju?

Uppáhalds flíkin mín var nýlega að skemmast og ég er frekar sár yfir því. 

Ég átti þröngan, röndóttan, síðerma bol frá COS sem passaði fullkomlega á mig og ég klæddist honum ítrekað, sem varð bolnum að bana að lokum.

Eyðirðu miklum tíma í að velja föt hverju sinni?

Ég eyði mestum tíma í að velja mér föt til þess að spila í en ég enda oftast á því að velja eitthvað sem mér þykir þægilegt að hreyfa mig í.

Hvernig myndirðu lýsa stílnum þínum?

Ég myndi lýsa stílnum mínum sem einföldum og þæginlegum.

Hefur stíllinn þinn breyst mikið í gegnum tíðina og hvernig þá?

Þegar ég var yngri var ég mun ævintýragjarnari en núna þegar ég kaupi föt. Núna er ég vissari með smekkinn minn og er lítið að kaupa föt ef ég veit ekki hvort þau muni klæða mig vel. 

Ég er samt hægt og rólega að reyna að koma mér aftur í gír að prófa mig áfram með stílinn minn.

Nýturðu þess að klæða þig upp?

Eins og stendur, nei ekkert sérstaklega. 

Ég klæði mig í sömu flíkurnar ítrekað. Í fullkomnum heimi væri ég eins og teiknimyndapersóna sem fengi alltaf að vera í sömu fötunum.

Hvað skiptir þig mestu máli í klæðaburði?

Þægindi og flottir litir skipta mér miklu máli í klæðaburði. Það skiptir mér líka miklu máli að velja mér föt úr endingargóðu efni. 

Þegar ég kaupi föt sem ég fíla nota ég þau vanalega þangað til að þau molna af mér.

Hvaðan sækirðu innblástur í tískunni?

Ég veit ekki hvort ég sæki innblástur eitthvert sérstakt, ég reyni bara að púsla saman flíkum sem mér finnst flott og vona það besta.

Ertu með einhver boð og bönn þegar það kemur að klæðaburði?

Ég klæðist ekki stuttbuxum. Það er mitt eina bann.

Hvað finnst þér heitast fyrir sumarið?

Rendur eða einhverskonar mynstur! Flest allir bolir sem ég hef keypt nýlega hafa verið röndóttir.

Býrðu yfir einhverju góðu ráði þegar það kemur að tísku?

Klæddu þig í það sem þér finnst flott.

Hér má fylgjast með Vöku á samfélagsmiðlinum Instagram.