Ein­læg skellibjalla sem stefnir á stóra sviðið

Anna Magga, eins og hún er oftast kölluð, er menntuð leikkona frá Rose Bruford College í London. Hún vakti athygli fyrir eftirminnilegt hlutverk sitt sem Una öryggisvörður í vinsælu þáttaröðinni IceGuys og kvikmyndinni Kulda.

Hún segist alltaf hafa stefnt að því að verða leikkona og dreymir um að stíga á stóra sviðið áður en dagar hennar verða taldir.

Anna Magga sýnir lesendum Vísis hina hliðina.

Fullt nafn? Anna Margrét Káradóttir, alltaf kölluð Anna Magga. Ef ég heyri Anna Margrét, þá held ég að ég hafi gert eitthvað af mér. Það er svona o ó móment.

Aldur? 41 árs.

Við hvað starfar þú? Ég er með marga hatta. Ég er sjálfstætt starfandi leikkona, söngkona, stundum útvarpsskona og svo er ég aðstoðarforstöðukona í félagsmiðstöð.

Fjölskylduhagir? Einhleyp kisukona, bý með Grétu Garbó, hefðarkisu.

Lífið og tilveran

Lýstu sjálfri þér í þremur orðum? Seinheppin, einlæg skellibjalla.

Hver er þín mesta gæfa í lífinu? Allt góða fólkið sem ég á að. Er ekkert eðlilega heppin með fólkið í kringum mig!

Hvar sérðu þig eftir tíu ár? Að gera enn meira af því sem ég er að gera í dag og kannski búin að hitta draumaprinsinn. 

Hann er þarna úti einhvers staðar.

Er eitthvað sérstakt sem þig langar til að upplifa áður en þú deyrð? Stóra sviðið.

Besta heilræði sem þú hefur fengið? Bangsi frændi minn átti eitt svo gott, sem er gott fyrir svona ofvirka konu eins og mig;

Það þarf ekki alltaf mikið að gera, stundum er nóg að vera.

Hvað hefur mótað þig mest í lífinu? Að vera örverpi, alin upp í litlu samfélagi. Ég er örverpið í fjölskyldunni og er mjög gömul sál fyrir vikið, en á sama tíma er ég líka algjör eilífðarunglingur. Svo var það alveg ótrúlega dýrmætt að alast upp í litlu samfélagi. Ég er frá Þorlákshöfn og þar þekkja allir alla. Ég elska að fara út í búð og geta heilsað öllum þar. Sakna þess dálítið eftir að hafa flutt í borgina.

Hvað gerir þú til að endurhlaða batteríin? Fer út í náttúruna, leita mikið í sjávarilminn eða skelli mér í sund. Það er best. Svo er ég nýbúin að uppgötva fargufu, það er algjörlega magnað dæmi og allra meina bót.

Hvert er þitt stærsta afrek? Að útskrifast úr draumanáminu mínu, leiklistinni.

Lífið í litlu hlutunum

Hver er uppskriftin að draumasunnudegi? Bjóða góðu fólki heim í tartalettur. Ég er mikil tartalettukona og tel mig gera góðar tartalettur, með fyllingu eins og notað er í heitan brauðrétt.

Hver er þinn uppáhalds staður á heimilinu? Ef ég hefði verið spurð fyrir mánuði hefði ég sagt sófann minn – hann er ekkert eðlilega næs, ég sofna oft þar. En núna hef ég gert svalirnar mínar svo kósý, þó þær séu algjört frímerki (þær eru svo litlar), að ekkert getur verið betra en að sóla sig þar þegar sú gula lætur sjá sig.

Hvað er fallegasti staður á Íslandi? Borgarfjörður Eystri, ekki spurning. Alveg galið fallegt þar. Hlakka til að fara þangað í sumar á fallegustu tónlistarhátíðina, Bræðsluna. Þar ætla ég að spila með lúðrasveitinni minni, Lúðrasveit Þorlákshafnar og fleiri flottum artistum.

En úti í heimi? Positano, á Amalfi ströndinni á Ítalíu. Fór í svo fallegt brúðkaup þar fyrir nokkrum árum, mun klárlega fara þangað aftur.

Venjur og vellíðan

Hvað er það fyrsta sem þú gerir þegar þú vaknar á morgnana? Kveiki á útvarpi, mér finnst svo heimilislegt að hafa kveikt á útvarpi, alin upp við það. Ákveðinn félagsskapur í því. Svo er það morgunmatur. En fyrst, útvarp!

Hvað er það síðasta sem þú gerir áður en þú ferð að sofa? Stundum er það heilalaust skroll í símanum, og stundum set ég eitthvað svæfandi hlaðvarp á og hlusta á þangað til ég sofna.

Hugar þú vel að heilsunni? – og ef svo er, hvernig? Já svona heilt yfir, auðvitað koma tímabil þar sem maður gæti gert betur en ég reyni að passa vel upp á næringuna mína, og fer reglulega út að skokka. Mér finnst best að hreyfa mig úti í náttúrunni.

Hvað ætlaðir þú að verða þegar þú yrðir stór? Sjoppukona og leikkona!

Manstu hvenær þú grést síðast – og af hverju? Já, það var nú bara í vikunni. Fékk erfiðar fréttir af dýrmætum fjölskyldumeðlimi og leyfði mér bara að gráta yfir því.

Ertu morgun- eða kvöldmanneskja? Ég held ég sé meiri kvöldmanneskja. Mér finnst allavega auðveldara að vaka fram eftir heldur en að vakna snemma.

Hver er þinn helsti kostur? Ég er með mikinn húmor fyrir sjálfri mér, eitthvað sem ég tamdi mér þegar ég áttaði mig á því hversu ótrúlega seinheppin ég er, dett upp stiga, já upp, ekki niður, kveiki í hárinu á mér, og svona. 

Þetta er allt bara efni í góðar sögur svo ég verð bara að taka þessu fagnandi og hafa húmor fyrir þessu.

En ókostur? Það er kannski ekkert endilega ókostur, en mér bregður alveg svakalega auðveldlega. 

Til dæmis bregður mér við brauðristina, þótt ég viti að brauðið kemur alltaf upp að lokum. Einn daginn labbaði ég inn á baðherbergið í gömlu vinnunni minni. Ég var ekki vön að hitta fólk þar, þar sem ég vann í morgunútvarpi á laugardagsmorgnum og yfirleitt var fámennt í húsinu. En allt í einu var manneskja inni á baðherberginu og ég öskraði alveg upp yfir mig. Greyið konan byrjaði þá að afsaka sig, sagði að hún hefði ekki greitt sér um morguninn og eitthvað þess háttar, eins og hún væri eitthvað ógnvekjandi, á meðan vandamálið lá bara hreinlega hjá hvekktu konunni mér.

Uppáhalds maturinn þinn? Ostur. Nei ég er bara ostasjúk. Þannig að settu ost á eitthvað og það verður um leið uppáhaldsmaturinn minn. Burrata, Halloumi, mmm!

Hvað veitir þér innblástur? Umhverfið, náttúran, fólk, tónlist, leikhús. Ég á alveg erfitt með að sitja kjurr í leikhúsi, langar bara inn í leikritið og vera með.

Smá skemmtilegt í lokin

Hvaða tungumál talarðu? Íslensku, ensku og gæti reddað mér mögulega á frönsku, er allavega á degi 425 í Duo Lingo að rifja hana upp, eftir að hafa lært hana í fjölbraut. 

Svo er ég líka að læra táknmál einu sinni í viku, það er sko eitt fallegt tungumál.

Áttu einhvern leyndan hæfileika? Ég get talað með helíum rödd.

Ef þú hefðir einn ofurkraft, hver væri hann? Mig dreymir svo oft að ég sé að fljúga, svo ég ætla að taka flugið, að ég geti flogið.

Draumabíllinn þinn? Ég hef alltaf verið veik fyrir gömlum Bjöllum.

Hælar eða strigaskór? Absalút strigaskór.

Manstu eftir fyrsta kossinum þínum? Já það geri ég. Vandræðalegur.

Er eitthvað sem þú óttast? Eins mikið og ég elska náttúruna þá hræðir hún mig líka, ég þurfti til dæmis að fara í dáleiðslu vegna jarðskjálftahræðslu.

Hvað ertu að hámhorfa á núna? Nýjustu seríuna af Ginny and Georgia. Fer svo lóðbeint í Love Island eftir það.

Hvaða lag kemur þér alltaf í gírinn? Ef þeir vilja Beef með Daniil og Joey Christ. Pink Lemonade með James Bay kemur svo sterkt á eftir.