Vann gull­verð­laun fyrir sykurblómaskreytingu

Í GK bakaríi á Selfossi vinna nokkrir starfsmenn við hin ýmsu störf en þar á meðal er Bryndís Bára Bjarnadóttir, sem lærði að vera bakari Í Canada. Þegar hún er ekki í vinnunni þá eyðir hún meira og minna öllum sínum tíma í að gera allskonar sykurblómaskreytingar. Hún er nýkomin heim frá Dubai þar sem hún keppti í alþjóðlegri sykurblómakeppni og hún gerði sér lítið fyrir og vann gullið þar.

„Þetta eru villiblóm, sem ég valdi og það hjálpaði mér að vinna gull í keppninni. Ég fékk bara einn og hálfan mánuð til þess að klára þetta. Allur frítíminn minn í þessum eina og hálfum mánuði fór í að gera þetta,” segir Bryndís Bára alsæl.

„Ég hef bara gert þennan blómvönd og einn annan þannig að ég er eiginlega bara nýbyrjuð í sykurmassablómum. Þannig að þetta er það furðulegasta og stærsta og erfiðasta, sem ég hef gert í þessu,” bætir Bryndís Bára við hlæjandi.

Og ætlar þú að reyna að tryggja þér gullið aftur að ári?

„Auðvitað, það verður maður að gera.”

Áhugasamir geta svo alltaf skoðað gull sykurskreytinguna hennar Bryndísar Báru á afgreiðsluborðinu hjá GK bakaríi á opnunartíma bakarísins.