Jóhanna Margrét snýr heim og fer í Hauka

Haukar tilkynntu um þetta í dag og fagna mjög komu Jóhönnu enda um sannkallaðan hvalreka að ræða fyrir liðið sem ætlar sér að halda áfram uppgöngu sinni og berjast um alla titla á komandi árum.

Jóhanna, sem er vinstri skytta, er uppalin í HK en hefur leikið í efstu deild Svíþjóðar síðustu þrjú ár. Hún kemur til Hauka frá Kristianstad þar sem hún lék með Haukakonunni Bertu Rut Harðardóttur.

Jóhanna, sem verður 23 ára í næstu viku, varð markahæsti leikmaður Olís-deildarinnar áður en hún fór út til Svíþjóðar. Hún á að baki 22 landsleiki og hefur skorað í þeim 11 mörk en hún var hluti af liðinu sem lék á HM 2023 og EM 2024.

Haukar urðu bikarmeistarar á nýafstaðinni leiktíð og léku til úrslita við Val um Íslandsmeistaratitilinn en töpuðu því einvígi 3-0. Félagið horfir í sumar á eftir sennilega besta leikmanni deildarinnar síðustu ár þegar Elín Klara Þorkelsdóttir heldur utan í atvinnumennsku til Sävehof í Svíþjóð.