„Ég tala ekki einu sinni um þetta við vini mína“

Hér má sjá viðtalið við Sonju í heild sinni:

„Söngvakeppnin var örugglega það erfiðasta og þar byrjar þessi hugsun um að ég ætlaði bara að hætta þessu öllu,“ segir Sonja í viðtalinu. Hún var ein skærasta stjarna áhrifavaldaheimsins hérlendis og einn daginn ákvað hún að loka öllum sínum aðgöngum og draga sig í hlé.

„Hata sjálfa mig smá fyrir það“

Árið 2018 tóku hún og Egill Ploder kollegi hennar úr Áttunni þátt í Söngvakeppninni.

„Egill syngur ógeðslega vel og ég skil ótrúlega vel að hann langaði að taka þátt. Hann hefur alltaf verið mjög góður vinur, alltaf til staðar og alltaf peppandi.

Hann vissi að ég var kvíðin á þessum tíma og sagði mér bara að hugsa þetta hvort mig langaði að vera með. Svo sagði hann: „Annars erum við nefnilega með aðra“. 

Ég sagði bara: „Nei, ekki að ræða það, ég tek þátt,“ segir Sonja og skellihlær. „Ég stal þessu af hinni söngkonunni og hata sjálfa mig smá fyrir það. Ég vildi prófa og þannig varð það.“

Hún segir að ferlið fram að undankeppninni hafi verið mjög skemmtilegt þar sem Sonja fékk meðal annars að læra söng heima hjá Birgittu Haukdal.

„Svo gerist heill hellingur og þetta varð bara flopp í rauninni. Ég veit ekki hvernig ég á að tala um þetta. Ég hef aldrei talað um þetta. Ég tala ekki einu sinni um þetta við vini mína þetta er svona: „Eigum við að segja Söngvakeppnin upphátt?“ Það hefur alltaf verið tabú orð.“

Fór að fá klikkað hatur

Sonja segist hafa tekið lífinu af miklum léttleika á þessum tíma.

„Allt var svolítið flipp fyrir mér og ég tók hlutunum ekki of alvarlega. Ég vildi reyna að hafa gaman að þessu. Ég lít alveg smá upp til mín þarna með það, þetta er ekki allt svona alvarlegt. Ég er svolítið að reyna að taka það hugarfar til baka núna.“

Atriðið klúðraðist og segist Sonja ekki hafa haft röddina til þess að standa undir því.

„Ég reyndi að hafa húmor fyrir þessu. Ég hugsaði bara: „Mér er alveg sama, fólk má segja það sem það vill“. Þangað til að fólk fór að segja það sem það vildi. Þá fór ég að fá klikkað hatur. Það voru þræðir á Beauty tips og Facebook síðum einungis um það hvað ég er léleg söngkona.

Þá fóru að koma athugasemdir um hvað ég væri léleg í einhverju öðru og mikill hatur sem ég gat ekki tekið. Mér fannst líka ömurlegt að ég mátti ekki hafa húmor fyrir þessu, það var búið að taka það af mér að ég mætti hlæja af þessu. 

Allt í einu var eins og ég þyrfti bara að hugsa: „Já, ég er ömurleg, þetta er svona glatað“. Ég mátti ekki upplifa þetta á minn hátt og hafa gaman að því.“

Sálfræðimeðferðin hjálpaði mikið

Sonja og Egill stóðu þétt við bakið á hvort öðru í gegnum þetta og Sonja leitaði sér sömuleiðis hjálpar.

„Það hjálpaði helling að fara til sálfræðings. Ég fattaði líka að fólk gat sagt allt sem það vildi um mig. Það var svolítið sjokk fyrir mig að vita að ég væri orðin svoleiðis manneskja. 

Það var skrýtið að öllum fannst að þau mættu segja hvað sem er.“

Sonja fékk afsökunarbeiðni frá stelpunni sem byrjaði þráðinn á Beauty Tips hópnum.

„Ég var löngu orðin vön því að fólk væri að bulla um mig, segja alls konar rugl um mig og ég nennti ekkert að bakka það upp.“

Þarna hafði þetta hins vegar gengið of langt.

„Ég skrifaði undir eitthvað eitt ljótt komment: „Mér finnst þetta hafa gengið of langt, hvað er í gangi hérna? Getur einhver stoppað þennan þráð.“

Þá var honum eytt og stelpan sem bjó til þráðinn og hafði náttúrulega leyft hundruð kommenta að vera þarna sendi mér afsökunarbeiðni. Ég svaraði: „Ekkert mál, takk fyrir“. Hún sá að sér, gerði mistök og hún var líka bara ung.

Ég sá mjög lengi ógeðslega eftir því að hafa tekið þátt en ekki lengur, það tók mig svo langan tíma en ég náði því.“