„Eins og konfekt­moli sem mann langar í aftur og aftur“

Alls eru 37 félagar í félaginu og eiga um 30 þeirra verk í bókinni. 

„Þetta er framúrskarandi árangur að svo margir félagar taki þátt. Félagið er stofnað í júní og svo svona ástarafkvæmi verði til þarf mikla samstöðu og orku,“ segir Brynja Sif Skúladóttir, ein stofnenda og formaður félagsins.

Hún segir bókina einstaka í íslenskri bókmenntasögu. Aldrei hafi áður jafn margir höfundar sameinað skrif sín í bók þar sem ástin er erfðaefni textanna. Hún segir höfundahópinn mjög ólíkan en á sama tíma einstaklega samhentan.

„Við erum á ólíkum aldri, með ólíkan bakgrunn en erum öll með ástríðu fyrir skrifum. Við erum mjög stolt af þessu. Við stefnum að því að gefa út eina til þrjár bækur á ári. Þetta rit var hugsað sem kynningarrit á flestum okkar félögum,“ segir Brynja.

Fjalla um ólíkar hliðar ástarinnar

Hún segir bókina mjög veglega. Hún sé um 130 síður og í henni sé að finna um 34 verk eftir um 30 höfunda sem eigi það öll sameiginlegt að fjalla um ástina.

„Um ást í sinni fjölbreyttustu mynd. Þetta eru sögur, ljóð og prósar. Hvert verk er frekar stutt. Lesandanum er boðið inn í ólíka heima þar sem fjallað er um margar hliðar ástarinnar. Þær tilfinningar sem textarnir kalla fram virka á þig bæði á meðan þú lest en ég er líka sannfærð um að tilfinningarnar geta fylgt lesandanum áfram. Þetta er eins og konfektmoli sem mann langar í aftur og aftur.“

Brynja segir allt sem snúi að ástinni hreyfi við tilfinningum okkar og það séu ekkert alltaf auðveldar tilfinningar.

„Það er allt litróf ástarinnar. Til að sjá ljósið þarftu að sjá skuggann og það er þannig líka með ástina. Það er oft ferð í rússíbana. Það er boðið upp á fegurstu tilfinningarnar en líka þær erfiðustu. Það er það sem er svo skemmtilegt við þessa bók hvað hún býður upp á mörg ólík sjónarhorn og mismunandi birtingamyndir ástarinnar.“

Brynja segir félagið frá stofnun í júní hafa verið mjög virkt. Þau hafi verið með gjörning á Menningarnótt þar sem þau aðstoðuðu fólk við að skrifa ástarbréf og stefni á að halda fleiri gjörninga eftir því sem fram líður. Ásamt því að skrifa texta og bækur.

„Það er okkar markmið að fólk setji meiri athygli á ást í textum.“

Finnst þér hún að einhverju leyti töluð niður, ástin?

„Annað þykir kannski vera merkilegra. Ástin er drífandi kraftur í mörgum skáldverkum þó við hugsum ekki um þau sem ástarsögur. Það er kannski stór skáldsaga þar sem er fjölskyldusaga í forgrunni en víða ást sem drífur textana áfram. Ástin er svo víða en það er ekki það sem er haldið uppi varðandi margar sögur. Við viljum leggja okkar að mörkum til að samfélagið leggi meðvitað meiri áherslu á ástina.“

Spurð hvort höfundar verkanna hafi skrifað áður segir hún hópinn mjög fjölbreyttan. Stór hluti félaga séu útgefnir höfundar og aðrir séu útskrifaðir með meistaragráðu í ritlist eða séu nemar í ritlist í háskólanum.

„Í okkar röðum er til dæmis fyrrverandi handhafi Íslensku bókmenntaverðlaunanna í fyrra, Þórunn Rakel Gylfadóttir og Rúnar Helgi Vignisson prófessor í ritlist. Svo þarf ekkert að fela það að Katrín Jakobsdóttir forsætisráðherra er að stíga sín fyrstu skref í að skrifa ástleitna sögu. Við erum auðvitað mjög ánægð með það,“ segir Brynja Sif en ekki síður með aðra minna þekkta höfunda sem blómstra í bókinni.

Spurð hvort það sé erfiðara að skrifa um ástina segir Brynja það ekki endilega erfiðara, en að það sé krefjandi.

„Þú þarft að fara inn í hjartað og sækja orkuna þaðan. Orkuna sem á að flæða inn í textann. Oft ertu líka að takast á við eitthvað og skrifa um eitthvað sem getur verið erfitt og sársaukafullt. Því ástin er líka þannig. Þetta er því ekki erfitt, en krefjandi. En það er það sem rithöfundar vilja. Við viljum skrifa um hluti sem hreyfa við okkur. Það er á sama tíma líka gefandi að skrifa um erfiðar tilfinningar, það er líka leið til að skilja þær betur. Allar manneskjur þurfa á ást að halda á einn eða annan hátt. Sama hvort það er ást á milli para, ást foreldra á barni, eða ást á viðfangsefni, eða ást á stað eða öðru. Við þráum öll að hafa ást í lífi okkar á einn eða annan hátt.“

Hún segir ástina birtast í bókinni á ólíkan hátt. Það sé ást milli tveggja einstaklinga, lostafull ást, ástarsorg, ást á orðum, augnabliks ást, ást úr fortíðinni, söknuður eftir ást, hikandi ást, ást í dauðaslitrunum, ættjarðarást, ást á mat og svo mætti lengi telja og í bókinni sé tekið á þessu öllu.

„Ástin getur verið nístandi erfið og myrk en hún getur líka kallað fram sterkustu og fegurstu tilfinningar sem við sem mannverur getum upplifað.“

Hér að neðan má sjá búta úr nokkrum verkum bókarinnar.