Risalax úr Aðaldalnum og fleiri stórir hængar

Við erum að fá fréttir nokkuð reglulega af vænum hængum og einn slíkur veiddist í Laxá í Aðaldal um helgina en það er líklega stærsti laxinn úr ánni í sumar. Laxinn var mældur 101 sm og er eins og ætterni hans annað úr ánni mjög þykkur á allar hliðar. Ummálið var 57 sm og þyngdin 25 ensk pund. Þessi rosalegi lax tók fluguna Valbein eftir nokkur köst í Brúarhyl. Veiðimaðurinn er Sindri Rósenkranz og var leiðsögumaðurinn Guðmundur Bjarnason honum til halds og trausts.

Annar stórlax kom úr Grímsá um helgina og eins og myndin ber með sér er þetta klárlega um eða yfir 100 sm fiskur. Það var Steinunn Björk Þorsteinsdóttir sem landaði þessum glæsilega laxi. Við höfum heyrt af nokkrum í þessum stærðarflokki síðustu daga meðal annars úr Haffjarðará og Grímsá en hópur sem var þar við veiðar í vikunni landaði einum rígvænum og missti tvo aðra eftir snarpa baráttu. Grímsá er þekkt fyrir þessa stóru hænga sem láta ekkert á sér kræla fyrr en á haustinn svo það verður gaman að sjá hvort einhver þeirra taki flugu hjá heppnum veiðimanni næstu daga.