101 sm lax úr Ytri Rangá

Sá sem á heiðurinn af því að landa þessum flotta laxi er Theó­dór Friðjóns­son en leiðsögumaður hans var Dagur Árni Guðmunds­son sem þekkir Ytri Rangá eins og handarbakið á sér. Laxinn veiddist í Kerinu sem er fyrsti staður ofan við Ægissíðufoss og það þarf smá leikni til að setja í lax þarna á flugu en þetta er fræg maðkahola. Þessi 101 sm lax er sá stærsti sem við höfum frétt af úr þessum landshluta í sumar en það er nóg eftir af veiðitímanum og síðsumarið eins og allir vita gjöfult á stóra hænga. 

Annars er góður stígandi í veiðinni í Ytri Rangá en þar hafa verið að veiðast 50-60 laxar á dag svo það eru greinileg merki þar eins og í Eystri Rangá að gangan er seinna á ferðinni en stundum. Þegar gangan er seint á ferðinni verður ágúst oftar en ekki mjög sterkur mánuður og ef heimtur eru góðar gæti verið að styttast í 100 laxa daga. Það verður þó að teljast ólíklegt í ljósi þess að heimtur almennt á landinu er undir væntingum með einhverjum undantekningum. Rangárnar eiga að vísu það gott í búi með að verða aldrei vatnslitlar en vatnsleysi hrjáir nú ansi margar ár á vestur og suðurlandi.