Fyrrum kærasta Tiger í mál og sakar hann um kyn­ferðis­lega á­reitni

Í frétt Sports Illustrated um málið kemur fram að fjölmiðillinn sé með dómsskjöl undir höndum en þar kemur fram að Woods hafi þvingað Erica Herman, fyrrum kærustu sína, til að skrifa undir þagnarskyldusamning þegar samband þeirra hófst.

Herman var starfsmaður á veitingastað í eigu Woods þegar þó rugluðu saman reitum en þau voru saman í fimm ár. Þegar sambandið hófst þurfti hún að skrifa undir þagnarskyldusamkomulag ef hún ætlaði sér að halda starfinu.

Þetta vill lögfræðingur Herman að sé kynferðisleg áreitni.

„Woods var yfirmaður Herman. Samkvæmt hans eigin frásögn þurfti hún að skrifa undir þagnarskyldusamning sem var krafa ef hún vildi halda starfinu. Að yfirmaður setji mismunandi starfskröfur vegna kynferðislegs sambands er kynferðisleg áreitni,“ skrifar lögfæðingur Herman í þeim dómskjölum sem Sports Illustrated hefur undir höndum.

Segist hafa verið göbbuð út á flugvöll

Sambandi Tiger Woods og Erica Herman lauk í mars síðastliðnum og strax í kjölfarið höfðaði Herman mál í von um að ógilda þagnarskyldusamninginn. Í Bandaríkjunum gilda alríkislög sem banna slíka samninga í þeim tilfellum sem aðilar eru sakaðir um kynferðisbrot.

Herman vill meina að hún og Tiger hafi gert munnlegt samkomulag um að hún gæti búið áfram í húsinu sem þau bjuggu saman í. Þegar sambandinu lauk þurfti hún hins vegar að flytja og vill meina að hún hafi í þokkabót verið göbbuð út af heimilinu.

Gabbið felst í því að hún hafi farið á flugvöllinn í þeirri trú að hún væri að fara í ferðalag til Bahamas ásamt Woods. Þar hafi hún hins vegar hitt fyrir lögfræðinga hans sem hafi reynt að fá hana til að skrifa undir annað samkomulag um þagnarskyldu. 

Það gerði hún ekki en ákvað hins vegar að höfða mál þar sem hún fer fram á 300 milljónir dollara í skaðabætur þar sem Woods hafi brotið samkomulag þeirra um að hún fengi að búa áfram í umræddu húsi.