Píparinn stefnir á sigur í Skúrnum

Skúrinn hóf göngu sína á Vísi fyrr í vikunni en þar keppa sex flytjendur um bestu nýju útgáfuna af gamla góða SS pylsulaginu auk þess sem þeir flytja einnig frumsamið lag.

„Ég er alltaf með útvarpið í gangi þegar ég er vinnandi,“ segi Alexander. „Þar heyrði ég einmitt auglýsinguna um samkeppnina um nýja SS pylsulagið og ákvað að prófa. Ég gerði sjálfur stefið, tók það upp og útsetti en Pálmar vinur minn syngur í laginu. Í lokaútgáfu lagsins væri ég til í að fá smá gítar inn, laga aðeins röddina og fá jafnvel létta strengi inn.“

Frumsamda lagið hans Alexanders Orra heitir Another day. „Ég átti þetta lag til en gerði nýja útgáfu af því en það er Chase Anthony sem syngur í því. Lagið fjallar um hugsanir í kjölfar ástarsambands sem gekk ekki upp. Um innri baráttu og að upplifa söknuð og eftirsjá. Að sjá eftir ást sem hefur glatast og vonina um annað tækifæri."

Í fyrstu sex þáttum Skúrsins eru flytjendurnir kynntir til sögunnar og spilað brot úr útgáfu þeirra af SS pylsulaginu og frumsamda laginu. Í seinni umferð verða lokaútgáfur laganna kynntar og eftir síðasta þáttinn verður kosið um bestu nýju útgáfu SS pylsulagsins og um besta frumsamda lagið.

Næstu daga verða fleiri keppendur kynntir til sögunnar.