Ennþá veiðast regnboga silungar í Minnivallalæk

Það virðist vera eitthvað meira en skrítið í gangi því það eru ennþá að veiðast regnbogasilungar í Minnivallalæk sem hingað til hefur verið þekktastur fyrir að vera ein mest krefjandi en að sama skapi skemmtileg urriðaá. Það er ekki vitað hvaðan þessi regnbogasilungur kemur en ekkert eldi á regnboga er við ána og þess vegna ekki um sleppifisk að ræða.

Eins er silungurinn heill á uggum og ber engin meri þess að vera úr eldi svo þetta mál er bara að verða skrítnara með hverjum deginum. Veiðimenn sem veiða slíka fiska í Minnivallalæk eru vinsamlegast beðnir um að drepa þennan fisk enda er hann ekki auðfúsugestur á svæðinu. Regnbogasilungur er einstaklega öflug hrognaæta og mikill mathákur á seiði annara stofna svo hann gæti mjög auðveldlega gert nokkurn skaða á einstökum stofni urriðans í þessari fallegu á.