Erfitt að vinna Þjóð­verja í þýskum leik

James Einar Becker er stjórnandi þáttanna, Tork gaurinn sjálfur. Mazda er japanskur bílaframleiðandi en með CX60 bílnum er reynt að keppa á markaði sem samanstendur af bílum frá BMW, Mercedes Benz og Audi en allt eru það þýskir bílaframleiðendur. James segir það vera erfitt fyrir Mazda að reyna að taka fram úr þeim. 

Hægt er að sjá þáttinn í spilaranum hér fyrir neðan, en sjá má fyrri þætti hér.

„Þið sjáið þetta ljósa fína leður á sætunum, svo er efni á mælaborðinu sem minnir mig helst á einhverjar steinþvegnar gallabuxur. Mér finnst Mazda vera búið að standa sig óaðfinnanlega vel þegar kemur að því að negla smáatriðin í innréttingunni,“ segir James um bílinn. 

Bíllinn er með 323 hestöfl, fjögurra sílendra bensínvél og rafhlöður en bíllinn er hybrid. Hann er 5,4 sekúndur frá núll upp í hundrað kílómetra hraða, sem að sögn James er ekki eitthvað sem endilega margir munu prófa í bíl sem er einna helst fjölskyldubíll.