Desemberspá Siggu Kling - Krabbinn

Þú hefur þá tilhneigingu til að gera allt fullkomið og vel og vandlega. En þú gætir orðið þreyttur á spretthlaupinu. Það er sko allt í 100 prósent lagi með það, því á köflum þarftu að sleppa stjórninni þó að í raun og veru sértu Universið og Guð búi í þér.

Guð hjálpar þeim sem hjálpar sér sjálfur heyrði ég einhvers staðar, svo finndu út að setja fólk í hlutverk í kringum þig, því að þú ert góður leiðtogi. Með því ertu aðeins að sleppa stjórninni og þú hefur fulla heimild til þess.

Þetta er mjög annasamur tími sem er að ganga í hönd og þig langar helst að klóna þig, sem væri stundum góð hugmynd, því að fólk elskar að hafa þig einhvers staðar í nándinni.

Þú ert að breyta í kringum þig og að breyta svo mörgu. Það er líka eins og þú sért að breyta um eigin stíl, þú mokar þig út úr hvaða drullupolli sem er því að hugsanir þínar verða á ljóshraða. Gefðu þér tíma og frið í huganum til að líta eftir ástinni, því að á þessu tímabili breytingar opnast glufa fyrir spennandi ævintýri.

Á Þorláksmessu er nýtt tungl að myndast, nýtt ofurtungl, og þá smellur svo margt saman sem að þú bjóst ekki við að kæmi til þín.

Þú finnur á þér hvort að í kringum þig séu persónur sem vilja þér ekki alltaf vel og þú þarft að nýta þér þetta skarplega innsæi sem að Alheimurinn hefur fært þér. Þú færð sérstaklega skilaboð þegar þú ert að fara að sofa eða þegar þú vaknar á morgnana. Þegar það kemur til þín sterkt hugboð eða boð til hugans, gerðu þá eitthvað í því á innan við klukkutíma, því að eftir það hjaðnar orkan til að láta þau skilaboð rætast.

Þú sleppur við svo margt á þessu tímabili, alveg eins og það væru niður felld hjá þér lán, að það streymi meiri peningar inn en eru að fara út. Það er lukka hjá þér í sambandi við einhverskonar mál, kannski málaferli, svo hafðu það hugfast að í þér býr þessi sigurvegari sem þú vilt vera.

Knús og kossar, Sigga Kling