Nýliðarnir að fá sautjánda leikmann sumarsins

Brasilíski vinstri bakvörðurinn Renan Lodi verður að öllum líkindum sautjándi leikmaðurinn sem gengur í raðir Nottingham Forest í sumar. Hann kemur til félagsins á láni frá Atlético Madrid.

Það er félagsskiptasérfræðingurinn Fabrizio Romano sem greinir frá þessu á Twitter-síðu sinni. Romano tekur þó fram að samningar milli félaganna séu enn ekki alveg í höfn.

Nottingham Forest mun greiða fimm milljónir punda fyrir lánssamninginn, en samningurinn felur í sér að félagið geti keypt leikmanninn fyrir 30 milljónir punda að lánssamningnum loknum.

Lodi er 24 ára vinstri bakvörður sem hefur verið hjá Atlético Madrid frá árinu 2019. Hann hefur leikið 84 deildarleiki fyrir félagið og á einnig að baki 15 leiki fyrir brasilíska A-landsliðið.