Orri skoraði fimm og Elverum er einum sigri frá úrslitum

Gestirnir í Elverum settu tóninn snemma leiks og skoruðu átta af fyrstu tíu mörkum leiksins. Íslendingaliðið hleypti heimamönnum aldrei nálægt sér í fyrri hálfleik og fór með sjö marka forskot inn í hléið í stöðunni 17-10.

Meira jafnræði var með liðunum í síðari hálfleik, en sigur Elverum var aldrei í hættu. Liðið vann að lokum tíu marka sigur, 34-24.

Orri Freyr Þorkelsson var atkvæðamikill í sóknarleik gestanna með fimm mörk, en Aron Dagur Pálsson komst ekki á blað. Elverum getur nú tryggt sér sæti í úrslitum með sigri á heimavelli í þriðja leik liðanna sem fram fer á miðvikudaginn eftir viku.