Dortmund og RB Leipzig vilja Ten Hag

Hollenski fjölmiðilinn De Telegraaf greinir frá því að Leipzig hafi nú þegar boðið Ten Hag samning á meðan Dortmund er með tilboð í bígerð.

Bæði Dortmund og Leipzig eru í efstu fjórum sætum þýsku úrvalsdeildarinnar og eru líkleg til að tryggja sér þátttökurétt í Meistaradeild Evrópu fyrir næsta tímabil. Eitthvað sem er aðeins fjarlægari draumur hjá Manchester United eins og er. Enska liðið er í sjöunda sæti úrvalsdeildarinnar, sex stigum frá Meistaradeildarsæti þegar liðið á sjö leiki eftir.

Miðilinn telur að Hollendingurinn sé að íhuga tilboð Leipzig þar sem að hann vill stýra liði sem keppir í Meistaradeild Evrópu. Yfirlýst markmið Leipzig er að brúa bilið í Bayern Munchen og Dortmund og stefnir liðið á að berjast um titla á komandi árum og Leipzig vill fá Ten Hag til að leiða þá vegferð.

Ten Hag hefur neitað gefa einhver ummæli um málið og hyggst ekki taka þátt í neinum vangaveltum og orðrómum í fjölmiðlum. Ajax hefur t.d. bannað enskum fjölmiðlum frá fjölmiðlafundi liðsins um helgina fyrir komandi leik Ajax gegn PSV í úrslitaleik hollenska bikarsins. Það er því ljóst að mikil samkeppni verður um undirskrift Ten Hag fyrir næsta leiktímabil.