Símar, smá­börn og ýmis­legt annað bannað í endur­komu Tiger

Í febrúar á síðasta ári lenti Tiger Woods í skelfilegu bílslysi er hann missti stjórn á bíl sínum. Talið var að kylfingurinn – sem er meðal þeirra bestu í sögunni – myndi aldrei geta spilað golf á nýjan leik. 

Tiger hefur áður snúið til baka þegar öll von virtist úti og hann ætlar að gera slíkt hið sama nú.  Hann var farinn að slá golfbolta undir lok árs 2021 og nú fyrir nokkrum dögum staðfesti hinn 46 ára gamli kylfingur að hann yrði með á mótinu. Ekki nóg með það, hann telur sig geta unnið.

Að Tiger sé með á mótinu hefur aukið áhuga gríðarlega og var þétt staðið er hann hitaði upp fyrir mótið í gær, miðvikudag. 

Það er hins vegar ljóst að ekki munu öll sem vilja geta borið þennan magnaða kylfing augum um helgina en að venju eru ýmsar reglur í gildi á mótinu. Til að mynda mega engin ungabörn vera með í för og þá eru símar, spjaldtölvur og fartölvur stranglega bannaðar. 

Engar eiginhandaráritanir munu eiga sér stað og þá verður bannað að taka skilti með sér til að lýsa yfir stuðning við kylfinga. Drykkir verða drukknir volgir þar sem kælibox verða ekki leyfð og stórir bakpokar eru einnig bannaðir.

Nánar um gríðarlegan fjölda reglna á mótinu hér að neðan.

Útsending Stöð 2 Golf hefst klukkan 19.00 í dag og stendur útsending yfir til 23.30. Sama er upp á teningnum næstu þrjá daga (8. til 10. apríl). Það ætti því að gefast nægur tími til að sjá endurkomu Tiger Woods.