Úkraínski Eurovision-sigurvegarinn Jamala á leið til Íslands

Þátturinn er á vegum Unicef og verður sýndur í beinni útsendingu á RÚV á laugardagskvöld eins og við sögðum frá hér á Vísi í gær. Söngkonan vill með þessu breiða út ákall um frið í heimalandi sínu. 

„Það er verið að fremja þjóðarmorð á úkraínsku þjóðinni. Engum er sýnd miskunn, ekki einu sinni börnum. Nú hafa 300 börn og ungmenni týnt lífi, að meðtöldum hörmungunum í Mariupol. Það sker mig í hjartað að heyra sögur af særðum börnum og börnum sem hafa misst foreldra sína. Tíminn er á þrotum. Ég skora á heimsbyggðina að stöðva voðaverk Rússa strax,“ segir Jamala.

Í þættinum Heimsins mikilvægasta kvöld verður fjallað um stríðið í Úkraínu og neyðaraðgerðir UNICEF í landinu. Einnig verður greint frá margvíslegum áhrifum heimsfaraldurs kórónuveirunnar á líf barna, meðal annars í Malaví, Síerra Leóne, Indónesíu, Bangladess, Sýrlandi og Jemen. Markmiðið með þættinum er að fjölga enn í hópi heimsforeldra á Íslandi sem styðja starf UNICEF með mánaðarlegum framlögum. 

Auk þess verður þátturinn sneisafullur af skemmtiatriðum með þjóðþekktu listafólki allt frá stjörnum prýddum grínsketsum Kanarí-hópsins, þar sem Annie Mist, Jón Gnarr, Steindi jr. og Bassi Maraj eiga stórleik, til glæsilegra tónlistaratriða með Páli Óskari og Diddú, Lay Low, Birgittu Haukdal, Daníel Ágústi og Sigríði Thorlacius. 

Nú hefur hin úkraínska Jamala bæst í hópinn. Rúnar Freyr segir í samtali við Lífið að söngkonan lendi hér á landi á morgun. Hún kemur fram í þættinum og syngur meðal annars lagið 1944, sem vann Eurovision 2016. 

Kynnar kvöldsins eru Einar Örn Jónsson og Sigurlaug Margrét Jónasdóttir, í myndveri RÚV, og Björg Magnúsdóttir og Guðmundur Pálsson sem standa vaktina í símaveri Vodafone og þar verður mikið um óvæntar uppákomur. Dagskárgerð er í höndum Þórs Freyssonar. Heimsins mikilvægasta kvöld hefst á RÚV á laugardagskvöld klukkan 19.45. Nánar um söfnunina og heimsforeldrastarf UNICEF er að finna á vef samtakanna.

Hér fyrir neðan má sjá flutning hennar á laginu 1944.