T1 tryggði sig örugglega inn í undanúrslitin

Spilað er svokallað Bo5 fyrirkomulag, en fyrra liðið til að vinna þrjár af fimm viðureignum fer áfram.

Fyrsti leikur dagsins var sá jafnasti af þeim öllum, en nokkuð jafnræði var með liðunum fyrstu tuttugu mínútur leiksins. Fljótlega eftir það fóru leikmenn T1 að byggja upp forskot og eftir 33 mínútur af League of Legends var forystan orðin of stór og T1 var komið 1-0 yfir.

Í rauninni er óþarfi að eyða of mörgum orðum í seinni tvær viðureignir dagsins, svo miklir voru yfirburðir T1. Í öðrum leik liðanna tóku þeir forystuna eftir rétt rúmar tíu mínútur og unnu sannfærandi sigur tuttugu mínútum seinna.

Þriðji og seinasti sigur dagsins var svo líklega sá öruggasti, en þá tóku leikmenn T1 forystuna einnig eftir um tíu mínútna leik. Í framhaldinu á því gjörsamlega keyrðu þeir yfir Hanwha Life og tryggðu sig örugglega inn í undanúrslit Heimsmeistaramótsins. Þar munu þeir mæta annað hvort evrópska liðinu MAD Lions eða ríkjandi heimsmeisturum, DWG KIA.

Átta liða úrslitin halda áfram á morgun, en þá eigast við Royal Never Give Up og Edward Gaming. Rétt eins og í dag hefst útsending á Stöð 2 eSport klukkan 12:00.