Volvo vöru- og flutningabílar söluhæstir

Kristinn Ásgeir Gylfason skrifar 6. ágúst 2021 07:00

Volvo vöru- og flutningabílar tróna á toppnum á Íslandi fyrstu sjö mánuði ársins með 33,7% hlutdeild og 28 nýja selda vörubíla yfir 10 tonn og er söluaukning Volvo á vörubílamarkaði yfir 200%. Í flokki vöru- og flutningabíla yfir 16 tonn er Volvo með 24 bíla og er Volvo FH16 mest seldi vöru- og flutningabíllinn af einstökum gerðum enda þrautreyndur við íslenskar aðstæður.

Meðfylgjandi er fréttatilkynning frá Brimborg.

Heildarmarkaður fyrir vörubíla yfir 10 tonn fyrstu sjö mánuði ársins er 83 bílar og er það aukning frá sama tíma í fyrra um 40,7%. Sala Volvo vöru- og flutningabíla vex því mun hraðar en markaðurinn og eykur Volvo því hlutdeild sína umtalsvert á vörubílamarkaði.

Með nýrri gerð Volvo vöru- og flutningabíla ásamt framúrskarandi þjónustu í nýrri þjónustumiðstöð Veltis á Hádegismóum hefur eftirspurn eftir Volvo vörubílum aukist mjög og er pantanastaða Veltis á Volvo vörubílum það sem eftir er árs mjög sterk.

Uppitími er meginmarkmið þjónustumiðstöðvar Veltis

Rekstraraðilar leggja leggja megináherslu á uppitíma enda skiptir höfuðmáli að atvinnubílar og atvinnutæki séu alltaf til reiðu í vinnu. Framúrskarandi uppitími veltur á fjórum þáttum þ.e. gæðum tækjanna, afkastagetu og tækjabúnaði þjónustumiðstöðvar, framúrskarandi varahlutaþjónustu og þekkingu og reynslu starfsmanna þjónustumiðstöðvar.

Veltir er Volvo atvinnutækjasvið Brimborgar og er umboðsaðili Volvo vörubíla, Volvo vinnuvéla, Volvo rúta og strætisvagna og Volvo Penta bátavéla.

Veltir flutti í nýja 4000 fermetra þjónustumiðstöð í lok árs 2018 með þrautreyndan hóp fagmanna þar sem allt er á einum stað með framúrskarandi aðgengi og athafnasvæði. Ný þjónustumiðstöð með besta mögulega tækjabúnaði hefur aukið afkastagetu og tryggt aukna þjónustu, framúrskarandi varahlutaþjónustu og þjónustuframboð sem hefur leitt til forystu á markaði fyrir atvinnubíla og atvinnutæki.

Efnahagslífið er að taka við sér um þessar mundir sem er að skila sér í mikilli aukningu á eftirspurn eftir atvinnubílum og atvinnutækjum. Það hefur leitt til þess að pantanastaða Veltis fyrir nýja atvinnubíla og atvinnutæki er mjög sterk sem mun tryggja umtalsverðan vöxt einnig á seinni hluta ársins.