Rekinn í burtu eftir að hafa nappað kylfu af McIlroy

McIlroy var að hefja leik á öðrum keppnisdegi á Renaissance-vellinum, ásamt Jon Rahm og Justin Thomas. Allt í einu birtist áhorfandi og tók eina af kylfunum hans. Öryggisvörður mætti svo og vísaði honum í burtu, eftir að hafa látið kylfubera McIlroys fá kylfuna.

„Maðurinn stóð þarna á bakvið teiginn en fór svo að pokanum hans Rorys, tók upp dræverinn og sleiflaði honum nokkrum sinnum,“ sagði vitni að atvikinu og bætti við:

„Þegar einhver sagði honum að hann mætti ekki gera þetta þá svaraði hann; „af hverju ekki?“ Þá komu öryggisverðir, sem fylgdu ráshópnum, og fóru með hann í burtu.“

David Wilson, meðlimur í golfklúbbnum Kilspindie í næsta nágrenni, náði atvikinu á myndband og sagði: „Þetta var afgreitt fljótt. Kylfingarnir hlógu að þessu og sögðust hafa séð strax að hann væri ekki kylfingur þegar þeir sáu hvernig hann hélt á kylfunni.“

McIlroy lék fyrsta hring mótsins, sem er í beinni útsendingu á Stöð 2 Golf, á -1 höggi. Hann er á -2 höggum þegar þetta er skrifað, eftir 14 holur á öðrum hring.

Rahm er með forystuna á samtals -10 höggum sem stendur en kylfingarnir eiga allir eftir að ljúka öðrum hring.

Bein útsending frá Opna skoska mótinu hefst kl. 11:30 á Stöð 2 Golf og beinar útsendingar frá mótinu verða þar einnig á morgun og á sunnudag.

Öll stærstu golfmótin eru á Stöð 2 Golf en upplýsingar um útsendingar má finna hér. Stöð 2 Golf kostar 3.990 krónur á mánuði en er einnig hluti af Sportpakkanum. Helgarpassa að Stöð 2 Golf má kaupa á kerfum Vodafone.