Veiðin hefst á fimmtudaginn

Stangveiðitímabilið 2021 hefst næsta fimmtudag og það eru margir veiðimenn og veiðikonur komnir út á brún í spennunni.

Það er alltaf gaman þegar nýtt veiðitímabil fer í gang en í ljósi veðuraðstæðna ætlum við að láta það vera að kalla þetta veiðisumar að sinni. Það er heldur köld spá framundan og þá sérstaklega á norðurlandi en norðanáttir verða að mestu ríkjandi fyrstu dagana eins og spáinn stendur í dag með tilheyrandi kulda og úrkomu.

Veiðimenn láta þetta ekkert á sig fá, það er nokkuð ljóst, því það er mikið bókað á öllum vinsælustu svæðunum og það má greinilega merkja meiri aðsókn á mörg svæðin ef skoðað er framboð veiðileyfa. Það sem við ætlum bara að mæla með er að allir séu vel klæddir og með nóg af heitum drykk á brúsa þegar staðið verður við bakkann þess fyrstu daga.