Gummi Ben velur bestu samherjana á ferlinum

Guðmundur Benediktsson, eða einfaldlega Gummi Ben, einn ástsælasti knattspyrnumaður sem og íþróttalýsandi Íslandssögunnar var í hlaðvarpinu Draumaliðið á dögunum þar sem hann valdi þá 11 bestu, allavega uppáhalds, leikmenn sem hann lék með á ferlinum.

Hlaðvarpið er í umsjón Jóhanns Skúla Jónssonar og hafa þó nokkur stór nöfn úr íslenskri knattspyrnu mætt og valið sitt draumalið.

Hlusta má á þáttinn í spilaranum hér að neðan.

Ekki sá fyrsti sem velur Draumalið sitt

Þar má nefna Arnar Bergmann Gunnlaugsson, Jóhannes Karl Guðjónsson, Sigurbjörn Örn Hreiðarsson, Gunnlaug Jónsson, Emil Hallfreðsson, Hallberu Guðnýju Gísladóttur, Hjörvar Hafliðason og svo mætti lengi telja. Margir þeirra sem hafa komið í þáttinn eiga það sameiginlegt að hafa valið Guðmund í sitt lið.

Ef ekki hefði verið fyrir skelfileg hnémeiðsli þá hefði atvinnumannaferill Guðmundar eflaust verið mun lengri en hann á endanum varð. Á ferlinum lék hann með Germinal Ekeren [Beerschot A.C. í dag] og Geel í Belgíu ásamt Þór Akureyri, KR og Val hér heima fyrir. Þá lék hann alls 10 landsleiki fyrir A-landslið Íslands.

Lið Guðmundar

Eftir að hafa sett niður 60 leikmenn á blað sem áttu allir skilið að vera í liðinu endaði Guðmundur með 11 leikmenn í 3-5-2 leikkerfi. 

Markmannstaðan var sú auðveldasta. Kristján Finnbogason er sá markmaður sem Gummi var lengst með, voru saman í KR og því augljóst val í markið hjá Guðmundi.

Í þriggja hafsenta kerfi voru þeir Lárus Orri Sigurðsson, margreyndur landsliðsmaður og atvinnumaður með Stoke City og West Bromwich Albion. Þormóður Egilsson, fyrirliði KR þegar Íslandsmeistaratitillinn skilaði sér loks aftur í Vesturbæinn eftir alltof langa bið. Stuðningsmenn KR eru enn að bíða eftir að sytta af Móða verði reist fyrir utan KR heimilið. Með þeim er svo Barry Smith en sá lék með Guðmundi hjá Val árin 2006-2008.

Í hægri vængbakverði er Birkir Már Sævarsson, núverandi leikmaður Vals og íslenska landsliðsins. Vinstra megin er svo Einar Þór Daníelsson, enn ein goðsögnin úr Vesturbæ Reykjavíkur sem lék þó aðallega á vinstri vængnum en Guðmundur reiknar með því að hann yrði töluvert sóknarsinnaður í uppstillingu sinni.

Á miðri miðjunni voru þeir Heimir Guðjónsson, fyrrum leikmaður KR og núverandi þjálfari Vals. Bjarki Bergmann Gunnlaugsson, fyrrum atvinnumaður og landsliðsmaður sem lék með Guðmundi hjá KR og að lokum Sigursteinn Davíð Gíslason heitinn. Vert er að taka fram að Steini Gísla, eins og hann var oftast kallaður, er sigusælasti leikmaður Íslandssögunnar með níu Íslandsmeistaratitla með ÍA og KR ásamt þremur bikarmeistaratitlum.

Upp á topp í liðinu voru tveir reyndir framherjar. Sá fyrri var Helgi Sigurðsson og lokapúslið var svo margreyndur landsliðsmaður sem Guðmundur lék með 1996 og 1997, sá heitir Ríkharður Daðason. Flinkur, hávaxinn og með magnaðan vinstri fót.

Að lokum var Willum Þór Þórsson valinn sem þjálfari liðsins en ásamt því að vera einkar sigursæll þjálfari í gegnum árin þá hefur hann þjálfað átta af 11 leikmönnum í liði Guðmundar. Þeir leikmenn eru Lárus Orri, Heimir Guðjóns og Ríkharður Daðason.

Þetta var drullu erfitt, komst að því að ég var mjög lánsamur með samherja á ferlinum og vildi þ.a.l. breyta reglunum en @joiskuli10 var mjög harður og aðeins 11 leikmenn fengu stöðu í byrjunarliðinu. #draumalididhttps://t.co/7qN0mk0E6T

— Gummi Ben (@GummiBen) February 12, 2020