Haukar fá öflugan liðsstyrk

Línu- og varnarmaðurinn Þráinn Orri Jónsson er kominn heim úr atvinnumennsku og hefur samið við handknattleiksdeild Hauka.

Vísir greindi frá þessum mögulegu félagaskiptum Þráins Orra fyrir þremur vikum en þau hafa nú gengið í gegn. Hann kemur til Hauka frá Bjerringbro-Silkeborg í Danmörku. 

Þráinn Orri lék meðal annars í EHF-bikarnum með danska liðinu sem varð í 4. sæti dönsku úrvalsdeildarinnar síðasta vor, á styttra móti en ella vegna kórónuveirufaraldursins. Þráinn Orri lék með Gróttu áður en hann fór í atvinnumennsku, fyrst hjá einu albesta liði Noregs, Elverum, og svo hjá Bjerringbro í vetur.