Flott opnun í Eystri Rangá

Eystri Rangá opnaði fyrir veiði í gær og miðað við hvernig áin fer af stað má reikna með góðu sumri þar á bæ.

Fyrir opnun á ánni höfðu menn séð laxa víða í henni og það á flestum svæðum. Það kemur þess vegna ekkert mikið á óvart að það hafi tekist vel til á fyrsta degi sem Eystri Rangá er veidd. Strax fyrir hádegi voru komnir átta laxar á land og nokkrir sem sluppu af færi veiðimanna en laxinn sem veiddist er bæði vænn og vel haldinn. Laxa varð vart víða í ánni og það eru orðin nokkur ár síðan það hefur gengið jafn vel á fyrsta degi í henni. Eystri Rangá hefur lengi verið ein af aflahæstu ám landsins og hækkandi hlutfall tveggja ára laxa á þátt í því að auka vinsældir hennar.

Undanfarin ár hefur tveggja ára lax verið stór ef ekki stærsti hluti veiðinnar fyrstu tvær til þrjár vikurnar svo þeir sem eiga daga þarna á næstunni geta gert ráð fyrir því að þegar flugan verður tekinn að þá er líklega og vonandi stór lax á flugunni. Það verður spennandi að fylgjast með Eystri Rangá næstu daga og vikur. Lokatala gærdagsins var sextán laxar.