Guðni reiknar með styrk úr digrum sjóðum FIFA

Guðni Bergsson, formaður KSÍ, segist reikna með því að FIFA og UEFA nýti sína sjóði til að styðja við aðildarsambönd sín vegna fjárhagslegra afleiðinga kórónuveirufaraldursins.

Guðni sat fyrir svörum í Sportinu í dag hjá þeim Henry Birgi Gunnarssyni og Kjartani Atla Kjartanssyni á Stöð 2 Sport í gær. Þar fór hann yfir það hvað KSÍ hefði gert til að styðja við aðildarfélög sín á þeim erfiðu tímum sem þau ganga nú í gegnum, líkt og reyndar KSÍ sem hefur skert starfshlutfall starfsmanna á skrifstofu. Þá hefur formaðurinn tekið á sig launaskerðingu.

Hálfur milljarður til íþrótta

Guðni segir KSÍ hafa verið í góðu sambandi við aðildarfélög sín og stjórnvöld, meðal annars til að leita leiða til að knattspyrnufélög, sem oft séu með starfsfólk í hlutastarfi, geti nýtt launaúrræði stjórnvalda. Mennta- og menningarmálaráðuneyti hefur ákveðið að verja hálfum milljarði króna til að styðja við íþróttastarf í landinu, en ekki er ljóst hvernig þeim fjármunum verður dreift og er starfshópur á vegum ÍSÍ að skoða leiðir til þess. KSÍ hefur styrkt aðildarfélög sín með því að flýta greiðslum vegna barna- og unglingastarfs, og greiðslum vegna sjónvarpssamninga. Þá er eins og fyrr segir von á stuðningi frá stóru samböndunum, þó aðallega FIFA.

Miklir fjármunir í sjóðum FIFA

„Við vonum að allt saman geri þetta að verkum að við komumst í gegnum þetta. Við gerum það á endanum. En þar fyrir utan eru auðvitað allir þessir einstaklingar sem þurfa að leggja sitt að mörkum eins og leikmenn, þjálfarar og stjórnendur, og annað launafólk hjá íþróttafélögunum, sem er að koma til móts við félögin,“ sagði Guðni í Sportinu í dag. Hann kvaðst ekki geta svarað því hvernig UEFA og FIFA myndu styðja sín sambönd:

„Ég held að það sé ótímabært að tjá sig um það en það eru miklir fjármunir í sjóðum hjá FIFA, og mér skilst að FIFA ætli sér að koma með einhvers konar aðstoð til sambandanna og þá aðildarfélaganna innan hvers sambands. Að sama skapi er UEFA auðvitað með ágætis fjármuni. Þar eru menn þó að horfa mögulega fram á verulegt tap tekna vegna breytinganna á EM sem átti að fara fram í sumar, og óvissunnar með Meistaradeildina og svo framvegis. Menn þurfa því að fara varlega, alveg eins og við erum að gera í KSÍ. Við vitum ekki hvernig allir þessir atburðir munu hafa áhrif á okkar fjárhag líka. Við þurfum því að fara varlega en ég geri ráð fyrir því að það verði einhvers konar stuðningur þessara alþjóðasambanda við fótboltann. Við munum fyrst og fremst auðvitað láta okkar aðildarfélög njóta þess. Þetta mun vonandi koma í ljós á næstu dögum og vikum,“ sagði Guðni.