Dæmdu Brynjar Ásgeir í bann en hafa nú dregið úrskurðinn til baka

Brynjar Ásgeir Guðmundsson, leikmaður FH, var dæmdur í leikbann á fundi aga- og úrskurðarnefndar KSÍ á þriðjudag en nú hefur leikbannið verið dregið til baka.

Brynjar var dæmdur í bann vegna uppsafnaðra gulra spjalda en hann hafði fengið þrjú gul spjöld í liði FH í sumar.

Brynjar er einnig þjálfari ÍH í 4. deildinni og fékk þar eitt gult svo hann var kominn með fjögur gul spjöld samanlagt í sumar.

Úrskurður aga- og úrskurðarnefndar KSÍ frá 24. september hefur verið leiðréttur í samræmi við ákvæði 9.3. í reglugerð KSÍ um aga- og úrskurðarmál.https://t.co/cV9UhtrBRI

— Knattspyrnusambandið (@footballiceland) September 26, 2019

Fyrst um sinn var Brynjar dæmdur í eins leiks bann og átti því að missa af lokaleik FH í Pepsi Max-deild karla er FH spilar gegn gömlu félögum Brynjars í Grindavík á laugardaginn kemur.

KSÍ hefur hins vegar nú breytt úrskurðinum en eftir aukafund nefndarinnar í gær kom þetta í ljós. Nánar má lesa um úrskurðinn hér.

Brynjar getur því spilað á laugardaginn er FH reynir að tryggja sér Evrópusæti en liðið berst við Stjörnuna um síðasta Evrópusætið.