Styðjum börnin og tökum slaginn með þeim

 „Nú þegar við fögnum 30 ára afmæli Barnasáttmála Sameinuðu þjóðanna skulum við ekki einungis skuldbinda okkur til að hlusta á börn og ungt fólk heldur styðja þau, taka slaginn með þeim og fylgja þeirra fordæmi,“ sagði Henrietta Fore, framkvæmdastjóri UNICEF, í athöfn tileinkaðri 30 ára afmæli Barnasáttmálans í New York í gær.

Fore sagði að fyrir þremur áratugum hafi heimurinn verið í miklu breytingaferli. Þá hafi Berlínarmúrinn verið að falla, aðskilnaðarstefnan verið á undanhaldi og veraldarvefurinn orðið til. Það hafi verið í því andrúmslofti sem þjóðarleiðtogar hafi komið saman og gefið öllum börnum heimsins loforð. Að þau ættu rétt á heilbrigðisþjónustu, menntun og vernd. Rétt til að láta rödd sína heyrast. Rétt á framtíð.

Fore talaði um að mikill árangur hafi náðst en minnti einnig á hvaða áskoranir börn standi frammi fyrir í dag, árið 2019. Hún rifjaði upp ýmislegt sem hún hafði skrifað í sérstöku bréfi til barna heimsins á dögunum í tilefni þrjátíu ára afmælis Barnasáttmálans eins og að æska barna væri að breytast og börn stæðu frammi fyrir mörgum nýjum áskorunum. Börn og ungmenni væru hins vegar að gera frábæra hluti á borð við loftslagsverkföll, mótmæli, kröfugöngur og baráttu fyrir friði sem hinum fullorðnum bæri ekki aðeins að taka eftir, heldur styðja í orði og verki.

UNICEF er ein af lykilstofnunum Sameinuðu þjóðanna í fjölþjóðlegri þróunarsamvinnu Íslands. Í gildi er rammasamningur milli íslenskra stjórnvalda og UNICEF um kjarnaframlög og margvísleg verkefni víða um heim í þágu barna.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.