Eitt stig skildi að 10. og 11. sætið í gær

Aðeins eitt stig var á milli atriðanna í 10. og 11. sæti á seinna undankvöldi Eurovision í Tel Aviv í gær. Þessu greinir Jon Ola Sand framkvæmdastjóri Eurovision frá á Twitter-reikningi sínum í dag og ítrekar að hvert atkvæði skipti máli.

Þá segir Sand að dómnefnd og áhorfendur hafi aðeins verið sammála um sjö af þeim tíu atriðum sem komust áfram í gær. Þá er rétt að árétta að um eitt stig er hér að ræða, ekki atkvæði, en stig dómnefndar gilda til helmings við stig úr símakosningu í keppninni.

We can now confirm that last night in the second Semi-Final, the difference between the act that finished 10th and 11th was just 1 point! Out of the 10 who qualified, juries and viewers agreed on 7 of them. Your vote matters! #Eurovision #DareToDream

— Jon Ola Sand (@jonolasand) May 17, 2019

Ljóst er að varla verður mjórra á mununum en í gær. Úrslitin voru einnig afar tæp á fyrra undankvöldi keppninnar en þá skildu tvö stig að atriðin í 10. og 11. sæti.

Nákvæm úrslit undankeppnanna verða ekki birt fyrr en að úrslitakvöldinu loknu en íslenska framlagið, Hatrið mun sigra í flutningi Hatara, verður sautjánda á svið á laugardag.

Eftir keppnina í gær er jafnframt orðið ljóst hvaða 26 þjóðir berjast um titilinn á lokakvöldinu. Þær eru eftirfarandi:

Grikkland, Hvíta-Rússland, Serbía, Kýpur, Eistland, Tékkland, Ástralía, Ísland, San Marínó, Slóvenía, Norður-Makedónía, Holland, Albanía, Svíþjóð, Rússland, Aserbadjan, Danmörk, Noregur, Sviss, Malta, Spánn , Þýskaland, Frakkland, Bretland, Ítalía og Ísrael.