Hailey Baldwin gat ekki svarað þessari spurningu og borðaði því svínahlaup

Kanadíski poppprinsinn Justin Bieber og fyrirsætan Hailey Baldwin gengu í það heilaga í september með leynilegri athöfn.

Í október síðastliðnum sótti fyrirsætan um einkarétt á nafninu Hailey Bieber en parið trúlofaði sig í sumar.

Hailey hefur nú tekið upp eftirnafnið Bieber og er fyrirhugað að halda heljarinnar brúðkaupsveislu á næstu vikum.

Í spjallþættinum Late Late show með Bretanum James Corden er oft á dagskrá liðurinn Spill Your Guts or Fill Your Guts sem gengur út á það að maður á annað hvort að svara erfiðri spurningu eða borða einhvern algjöran viðbjóð.

Hailey Bieber mætti á dögunum og tók þátt í liðnum og var eins spurning um að velja versta útlit Justin Bieber með því að horfa á þrjár mismunandi myndir frá mismunandi tímabilum. Hailey neitaði að svara og varð að borða svínahlaup.