Talið niður í vorveiðina

Þegar litið er út um gluggann í dag er kannski fátt sem ætti að minna á veiði og veiðiskap en það er samt þannig að nú telja veiðimenn niður í fyrstu veiði ársins.

Vorveiðin hefst 1. apríl og þá er mestur straumurinn í sjóbirtingsveiðina en urriðaveiðin á Þingvöllum er þó farin að verða með vinsælustu veiðisvæðunum í apríl og maí.  Það er mikil ásókn í þau veiðisvæði sem eru með þeim bestu og nægir þar að nefna sjóbirtingssvæðin við Kirkjubæjarklaustur en eins er mikið sótt í t.d. Litluá, Húseyjakvísl, Minnivallalæk, Varmá, Laxá í Kjós og Heiðarvatn.

Þetta er líka sá tími ársins þegar veiðimenn eru að bóka sína daga í aðra veiði eins og laxveiðina en bestu árnar eru margar hverjar að verða vel seldar og júlíleyfi eru með öllu að verða ófáanleg.  Það styttist hratt í að veiðimenn og veiðikonur landsins fari aftur í vöðlurnar eftir vetrarhvíld en það er rétt tveir og hálfur mánuður í að gleðin byrji aftur og það líður hratt þegar spennan er mikil.