Sjö barna móðir: „Þoli ekki reiði og forðast fólk sem er að skammast og rífast“

Eygló Lind Egilsdóttir eignaðist frumburð sinn aðeins 19 ára og annað barn sitt tveimur árum síðar. Þá ákvað hún að barneignum væri lokið og seldi barnavagninn. Þriðja barnið mætti aftur á móti í heiminn fimm árum seinna og árið 1978 kom það fjórða og síðan það fimmta árið 1981.

Eftir skilnað við barnföður sinn var Eygló endanlega sannfærð um að fleiri yrðu börnin ekki en þá kynntist hún öðrum manni. Eftir átta ára hlé á barneignum fæddist sjötta barnið við árið 1989 og 41 árs eignaðist hún sjöunda barnið árið 1991. Eygló skildi aftur og ól börnin sín sjö að mestu ein.

Sigrún Ósk Kristjánsdóttir fékk að kynnast Eygló í þættinum Margra barna mæður á Stöð 2 í gærkvöldi.

Eygló er 68 ára og er sest í helgan stein en hún býr ein í Borganesi, eitthvað sem hún hefur ekki gert í mörg ár.

 

„Hún er mjög uppátækjasöm og það er alltaf rosalega stutt í grín og leik,“ segir Sonja Lind Estrajher Eyglóardóttir, dóttir Eyglóar, og bætir við:

„Mér finnst dásamlegt að börnin mín fái að hafa hana sem ömmu. Við til dæmis erum að fara í nestisferð upp í Einkunnir, skógrækt hérna fyrir ofan, og sitjum þar inni í móa og allir að drekka kaffi. Þá er hún allt í einu búin að drösla einhverjum úlfabúningi með sér í töskunni og fer og felur sig. Kemur síðan allt í einu út og hræðir börnin.“

„Ég þarf að segja þér eitt sem margir hneykslast sennilega yfir. Ég hef aldrei verið að skamma krakkana mína,“ segir Eygló.

„Auðvitað fengu þau reiðisköst en þá hunsaði ég þau bara og fór aldrei að rökræða við þau í einhverju kasti. Frekar spjalla ég bara við þau daginn eftir þegar kastið er liðið hjá. Ég þoli ekki reiði og forðast fólk sem er að skammast og rífast.“

Hér að neðan má sjá brot úr síðasta þætti.