Stjörnuspá Siggu Kling – Ljónið: Ástin svo miklu mýkri í kringum þig

Elsku Ljónið mitt, það er svo sannarlega hægt að segja þú skreytir lífið, þú berð alltaf af hvar sem þú ert og hefur svo mikið að gefa. Þú ert stórbrotin manneskja og þarft að vera stoltur af þér, því stolt Ljón er sterkara en allt. Það er að koma til þín freistandi tilboð eða vinningur í lífinu og þér mun farnast miklu betur í fjármálum, enda skiptir það þig miklu máli.

Ef þú ert ekki ánægður með staðsetninguna þar sem þú býrð, þá færðu líka tilboð um að geta breytt til að færa þig á draumasvæðið þitt.

Þú munt skila þínum verkum fullkomlega, en verður pirraður ef aðrir hugsa minna um að klára það sem þeir eiga að gera, en þú getur ekki breytt öðrum svo haltu bara áfram þinni sterku stefnu. Það er að koma fullt tungl í Hrútsmerkinu og það gefur styrk, vinnuanda og kraft til að breyta því sem þú hefur ekki haft tíma eða nennu til að breyta, þá geturðu verið sáttur eftir vel unnið dagsverk.

Ástin er eitthvað að verða svo miklu mýkri í kringum þig, taktu eftir hvernig hlutirnir eru að verða betri og hentu út gömlu rugli úr heilabúinu á þér sem eru í sambandi við hvernig hlutirnir voru og hvernig þér leið.

Þú þarft að setja örlítið meiri kraft í félagslífið og styrkja tengsl, þetta þýðir samt alls ekki þú þurftir að drekka hálfan barinn ef þú ferð í partý, heldur er best fyrir þig að nýta þennan kraft sem er að koma yfir þig fullur af lífi en ekki léttvíni.

Þú þarft að hafa mikið líkamlegt úthald til að temja Ljónið í þér, svo hugsaðu bara einn dag í einu í lífinu, hreyfðu þig meira, stundaðu útivist og gerðu eitthvað sem þú bjóst ekki við þú myndir setja á dagskrána, komdu þér á óvart og breyttu lífstíl, þá mun lífsgleði og fögnuður mæta þér eins enginn sé morgundagurinn.

Knús og kossar, þín Sigga Kling

Fræg Ljón: Cara Delevingne fyrirsæta, Ágústa Eva Erlendsdóttir, leik- og söngkona, Halldóra Geirharðsdóttir leikkona, Birgitta Haukdal söngkona, Barack Obama Bandaríkjaforseti, Ásdís Rán fyrirsæta, Gísli Gíslason geimfari, Geir Ólafsson söngvari, Þórunn Antonía alheimsstjarna, Albert Eiríks, matgæðingur af bestu sort, Jón Óttar Ragnarsson, athafna- og fjölmiðlamaður, Jennifer Lopez söngkona, Diddú, Sirrý Arnardóttir fjölmiðlakona, Arnór Dan, söngvari, Agent Fresco, Ana Mafalda, besta húshjálp í heimi, Sema Erla Serdar, baráttukona, Rósa Ingólfsdóttir, sjónvarpskona, Anton Máni Svansson, kvikmyndaframleiðandi, Hulk.