Össi deilir fallegum og öðruvísi óléttumyndum af Thelmu

„Ég var alltaf að vinna en ég vinn við kvikmyndagerð. Eins og allir vita sem eitthvað kannast við bransann, þá eru þetta alltaf mjög langir dagar og oft gefst lítill tími fyrir annað í lífinu á meðan verkefni eru. Ég hef verið að taka óléttumyndir af vinum mínum en við höfðum rætt það að við ætluðum að taka myndir,“ segir Össi Árnason sem hefur undanfarnar vikur tekið myndir af eiginkonu sinni Thelmu Björk Jónsdóttur kasóléttri við ýmis heimilstörf og fleira.

„Það átti að fara í eitthvað eins og venjan er og finna eitthvað gott spott í náttúrunni. Alltaf þegar ég var í fríi þá var eitthvað sem kom uppá, ef það var ekki skítaveður þá var það eitthvað annað sem þurfti að sinna.“

Össi segist því hafa þurft að taka myndir af Thelmu heima við hversdagsverkin og serían hefur bara þetta þema Ólétt kona og daglegt líf og hver og ein mynd hefur heiti.

„Það eru kannski svona tvær vikur síðan ég smellti af henni fyrstu myndinni og svo viðraði ég þá hugmynd við hana að við ættum kannski deila myndunum því þær væru fallegar og öðruvísi,“ segir Össi sem hefur verið að deila myndunum á Facebook.

Frábært að eiga þessar myndir þegar fram líða stundir

„Henni finnst þetta bara gaman því auðvitað verður frábært að eiga þessar myndir seinna meir. Hún er ekki alltaf meðvituð um að ég sé að taka myndir því vélin er alltaf við hendina og reyni ég svolítið að hafa mest þannig þó auðvitað stundum veit hún og verður að vita eins og sumar myndir gefa til kynna,“ segir Össi en serían er í fullum gangi þangað til barnið kemur.

„Ég hef verið að pósta einni á dag til að gera þetta smá artí og skemmtilegt. Ef fólk hefur áhuga á að fylgjast með þá er hægt að finna mig á instagram undir poetmusic  og svo er líka hægt að sniglast inná vegginn minn á Facebook.“

Hér að neðan má sjá myndir sem Össi tók af eiginkonu sinni og hefur hann nefnt hverja mynd.