Hressileg maðkaopnun í Ytri Rangá

Eftir ágætt tímabil þar sem flugan var eina vopn veiðimanna hefur maðkinum nú verið hleypt aftur í Ytri Rangá.

Veiðin í Ytri hefur eins og annars staðar róast nokkuð þegar liðið er á tímabilið en núna þegar maðkurinn er leyfður aftur hrökkva veiðitölurnar upp aftur og það nokkuð hressilega.  Opnunarhollið í maðkveiðinni var til að mynda með 136 laxa á land eftir aðeins tvær vaktir sem gerir um 10-12 laxa á stöng á hverri vakt en auðvitað er veiðinni ekki alveg svona jafnt skipt þar sem sumir veiða meira en aðrir.  Heildarveiðin í Ytri Rangá var síðasta miðvikudag 2.774 laxar en veiðin allt tímabilið í fyrra var 7.451 lax svo það er nokkuð útséð að það verður að teljast harla ólíklegt að áin skili neinni tölu nálægt því á þessu tímabili.  Hún er að detta yfir 3.000 laxa og þeir sem þekkja hana vel segja að miðað við það magn af laxi sem virðist vera í ánni þá gæti lokatalan verið um 4.500 - 5.000 laxar ef vel veiðist það sem eftir er en veitt er í ánni fram í október.