50 laxa dagar í Eystri Rangá

Það hefur komið heldur betur kippur í Eystri Rangá síðustu daga og undanfarið hafa verið að veiðast um og yfir 50 laxar á dag.

Ástundun hefur líklega ekki verið mikil en eins og kom fram í miðlum var stórt holl afbókað og því leit út fyrir að áin myndi bara renna í einhverja daga.  Það hafa þó einhverjir verið við veiðar enda má sjá á mörgum Facebooksíðum nokkurra góðra vina Veiðivísis að það er feykna veiði í ánni.  Það er greinilega mikill kraftur í göngunum og eftir þeim heimildum sem við höfum þá eru stangirnar auðveldlega að taka 10-12 laxa á dag og þá sýnist okkur að það séu kannski 5-6 að veiða ánna sem annars er veidd á 18 stangir sé hún fullmönnuð.  Þegar göngurnar í Eystri eru jafn sterkar og raun virðist vera er bara spurning um tíma hvenær fyrstu 100 laxa dagarnir detta inn.