Kippur í veiðinni í Eystri Rangá

Það er greinilega að koma kippur í veiðina í Eystri Rangá og göngur að aukast enda er það farið að sjást á veiðitölum.

Síðustu daga hafa verið að koma nálægt 50 löxum á land á dag og það er alltaf að aukast lífið í ánni.  Hún er yfirleitt að hrökkva í gang um þennan tíma og þá fer hún iðullega yfir 50 laxa á dag og jafnvel upp í 70-90 laxa daga þegar vel liggur á henni.

Það getur sett strik í veiðitölurnar að hún dettur stundum í lit og verður illveiðanleg en haldist hún nokkuð hrein í lengri tíma er hún ansi fljót að raða sér á topp fimm listann yfir aflahæstu ár landins.  Veiðimenn sem hafa veið við ánna síðustu daga hafa vel tekið eftir göngum í ána og þá sérstaklega þegar vaktin hefur verið staðinn við Bátsvaðið sem er einn neðsti veiðistaðurinn í Eystri Rangá.  Í síðustu viku þegar tölur komu út fyrir veiðina í laxveiðiánum voru komnir 216 laxar á land en hún er núna að teygja sig í 500 laxa og á klárlega eftir að renna í sitt besta tímabil.